तरडे (ता. हवेली) : हवेली तालुक्यातील तरडे परिसरात डोंगर पोखरून कथितरित्या मोठ्या प्रमाणात मुरूम उत्खनन करून त्याची विक्री होत असल्याचा आरोप स्थानिक नागरिकांकडून करण्यात येत आहे. या प्रकारामुळे परिसरातील पर्यावरणीय समतोल बिघडण्याची भीती व्यक्त केली जात असून संबंधित विभागाच्या भूमिकेवरही प्रश्नचिन्ह उपस्थित केले जात आहे.

स्थानिकांच्या म्हणण्यानुसार, डोंगर भागात मोठ्या यंत्रसामग्रीच्या सहाय्याने मुरूम काढला जात असून त्याची वाहतूक ट्रक व डंपरद्वारे सुरू असल्याचे दिसून येते. या कथित उत्खननामुळे डोंगरांचे नैसर्गिक स्वरूप बदलत असून भविष्यात पावसाळ्यात मातीची धूप, भूस्खलन तसेच पर्यावरणीय हानी होण्याची शक्यता व्यक्त केली जात आहे.

नागरिकांचा आरोप आहे की, संबंधित महसूल, गौण खनिज व इतर जबाबदार विभागांचे या प्रकाराकडे दुर्लक्ष होत आहे. जर आवश्यक परवानग्यांशिवाय उत्खनन होत असेल, तर त्याची तातडीने चौकशी करून संबंधितांवर कठोर कारवाई करण्यात यावी, अशी मागणी स्थानिकांकडून करण्यात येत आहे.

परिसरातील नागरिकांनी जिल्हाधिकारी, तहसील प्रशासन, महसूल विभाग आणि गौण खनिज विभाग यांनी घटनास्थळी प्रत्यक्ष पाहणी करून उत्खनन कायदेशीर आहे की नाही याची सखोल चौकशी करावी, तसेच नियमांचे उल्लंघन आढळल्यास संबंधितांवर दंडात्मक व फौजदारी कारवाई करावी, अशी मागणी केली आहे.

या प्रकरणाबाबत संबंधित शासकीय विभागांची अधिकृत भूमिका अद्याप समोर आलेली नाही. प्रशासनाने या आरोपांची दखल घेऊन वस्तुस्थिती स्पष्ट करावी आणि आवश्यक ती कारवाई करावी, अशी अपेक्षा नागरिक व्यक्त करत आहेत.

Maharashtra Express News

maharashtraexpressnews.live

The post तरडेच्या डोंगरांची खुलेआम लूट? कथित बेकायदा मुरूम उत्खननामुळे पर्यावरण धोक्यात; प्रशासनाच्या कारवाईची मागणी appeared first on Maharashtra express news..

लोणी काळभोर : शासनाने नव्याने सुरू केलेल्या ‘महासारथी पोर्टल’, ग्रामपंचायत व महाविद्यालयीन स्तरावर वितरित करण्यात आलेल्या स्वतंत्र आयडी आणि व्हॉट्सॲपद्वारे शासकीय प्रमाणपत्र उपलब्ध करून देण्याच्या निर्णयामुळे राज्यातील हजारो महा ई-सेवा केंद्र चालकांच्या उपजीविकेवर गंभीर परिणाम होत असल्याचा आरोप ‘अखिल स्तरीय महा ई सेवा व आधार केंद्र संघटने’ने केला आहे. या धोरणाच्या निषेधार्थ संघटनेने १ जुलैपासून मुंबईतील आझाद मैदानावर बेमुदत धरणे आंदोलन छेडण्याचा, तसेच आवश्यकता भासल्यास ‘अर्धनग्न’ आंदोलन करण्याचा इशारा दिला आहे.

या पार्श्वभूमीवर पूर्व हवेलीतील महा ई-सेवा केंद्र चालकांनी लोणी काळभोर येथील अप्पर तहसीलदार तृप्ती कोलते यांना निवेदन सादर केले. या निवेदनाद्वारे शासनाने नव्या धोरणांचा फेरविचार करून महा ई-सेवा केंद्र चालकांच्या मागण्यांकडे तातडीने लक्ष द्यावे, अशी मागणी करण्यात आली.

संघटनेचे अध्यक्ष डॉ. अमर पवार (ठाणे), कार्याध्यक्ष उमंग शहा (मुंबई) आणि सचिव विनोद तायडे (अमरावती) यांनी मुख्यमंत्री, राज्यपाल आणि माहिती तंत्रज्ञान मंत्र्यांना पत्र पाठवून विविध मागण्या मांडल्या आहेत.

संघटनेच्या म्हणण्यानुसार, राज्यात अधिकृत ‘आपले सरकार सेवा पोर्टल’ कार्यरत असताना समांतर यंत्रणा उभारण्यात येत आहे. त्यामुळे महा ई-सेवा केंद्रांचा व्यवसाय मोठ्या प्रमाणावर प्रभावित होत असून, राज्यभरातील लाखो सुशिक्षित बेरोजगार युवकांनी उभारलेल्या या केंद्रांच्या अस्तित्वावरच प्रश्नचिन्ह निर्माण झाले आहे. शासनाने याबाबत तात्काळ सकारात्मक भूमिका घेतली नाही, तर राज्यभरातील महा ई-सेवा केंद्र चालक मुंबईत एकत्र येऊन तीव्र आंदोलन छेडतील, असा इशारा देण्यात आला आहे.

निवेदन देताना संघटनेचे महाराष्ट्र राज्य पुणे जिल्हा निरीक्षक राज गायकवाड, पुणे जिल्हा अध्यक्ष दादासाहेब गायकवाड, जिल्हा सचिव गणेश ठोंबरे यांच्यासह राजेश केरकर, सुभाष काळभोर, समीर सावंत आणि इतर महा ई-सेवा केंद्र चालक उपस्थित होते

Maharashtra Express News

maharashtraexpressnews.live

The post महा ई-सेवा केंद्र चालकांचा शासनाविरुद्ध एल्गार; १ जुलैपासून आझाद मैदानावर ‘अर्धनग्न’ आंदोलनाचा इशारा appeared first on Maharashtra express news..

पुणे : पुणे जिल्ह्यातील प्रशासकीय कामकाज अधिक प्रभावी आणि नागरिकाभिमुख करण्याच्या उद्देशाने बारामती येथे अपर जिल्हाधिकारी कार्यालय स्थापन करण्याचा प्रस्ताव पुढे आला असून, त्यासंदर्भात पुणे जिल्हाधिकारी कार्यालयाने सार्वजनिक सूचना प्रसिद्ध केली आहे.

महसूल व वन विभाग, मंत्रालय मुंबई यांच्या निर्देशानुसार पुणे जिल्ह्यात नवीन अपर जिल्हाधिकारी कार्यालयाच्या मुख्यालयाबाबत सुधारित माहिती व नकाशे शासनाकडे सादर करण्यात आले होते. त्यानंतर शासनाच्या मार्गदर्शक सूचनांनुसार जिल्हाधिकारी पुणे यांनी बारामती येथे अपर जिल्हाधिकारी कार्यालय स्थापन करण्याबाबत 15 दिवसांची जाहीर सूचना प्रसिद्ध केली आहे.

प्रस्तावानुसार बारामती हे अपर जिल्हाधिकारी कार्यालयाचे मुख्यालय राहणार असून, या कार्यालयाच्या कार्यक्षेत्रात बारामती, दौंड आणि इंदापूर हे तीन तालुके समाविष्ट करण्यात येणार आहेत.

तर पुणे जिल्ह्यातील उर्वरित पुणे शहर, आंबेगाव, खेड, मावळ, मुळशी, हवेली, शिरूर, पुरंदर, जुन्नर, भोर आणि राजगड हे तालुके जिल्हाधिकारी कार्यालयाच्या कार्यक्षेत्रात राहतील. पुणे जिल्ह्यात एकूण 14 तालुके असून प्रशासनिक सोयीसाठी ही पुनर्रचना करण्यात येत असल्याचे पत्रात नमूद करण्यात आले आहे.

या प्रस्तावाबाबत नागरिक, संस्था किंवा संबंधित घटकांना काही हरकती अथवा सूचना असल्यास त्या 8 जुलै 2026 पर्यंत जिल्हाधिकारी कार्यालय, पुणे येथे लेखी स्वरूपात सादर करण्याचे आवाहन करण्यात आले आहे.

या निर्णयामुळे बारामती, दौंड आणि इंदापूर परिसरातील नागरिकांना महसूल व प्रशासनाशी संबंधित कामांसाठी अधिक सुलभ आणि जलद सेवा उपलब्ध होण्याची अपेक्षा व्यक्त केली जात आहे.

Maharashtra Express News

maharashtraexpressnews.live

The post बारामतीला मिळणार स्वतंत्र अपर जिल्हाधिकारी कार्यालय? पुणे जिल्हाधिकारी कार्यालयाची जाहीर सूचना प्रसिद्ध!  appeared first on Maharashtra express news..

धाराशिव,प्रतिनिधी : 3 जुन 2006 ला कै पवनराजे व समद काझी यांची निर्घृण हत्या केली, त्या दिवसापासुन आम्ही संघर्ष करीत आहोत. डॉ पाटील यांच्या दबावामुळे याचा तपास राज्य पोलिस व्यवस्थित करीत नसल्याने आम्ही उच्च न्यायालयात याचिका दाखल केली, त्यानंतर सीबीआयकडे तपास गेला. 20 जुनला जो निकाल दिला त्यात कोर्ट राजकीय वैमनस्य मान्य करते, हत्येचा उद्देश मोटिव्ह मान्य करते व सर्व आरोपीची निर्दोष मुक्तता करते, मग पवनराजे यांना कोण हत्या कोणी केली याचे उत्तर मिळाले नाही हे अतिशय दुर्दैवी आहे. 

निकालाच्या विरोधात उच्च न्यायालयात अपील करणार असुन निकालातील त्रुटी मांडणार आहोत. ज्या निकालासाठी 20 वर्ष आम्ही लढत आहोत त्यासाठी पुन्हा उच्च न्यायालयात जाणार असुन ते कोर्ट आमच्या बाजुने निर्णय देईल अशी अपेक्षा आहे. कुटुंबातील प्रमुख नसल्याने काय हाल व दुःख होते ते आम्ही रोज भोगत आहोत. 

ज्या लोकांनी ज्या कारणासाठी हत्या केली त्यांचा हेतू कधीही साध्य होऊ देणार नाही. राजकीय विरोधकाची हत्या केली तरी तो संपत नसतो, तो तयार होत असतो त्यामुळे मी राजकारणात आलो.ओमराजे काय काम करतो ते लोकांनी पहिले आहे, त्यामुळे सोशल मीडियावर चुकीचे चालु आहे. 

सगळ्यांशी चर्चा करून मत जाणून निर्णय घेणार आहे, माझा मोबाईल नंबर सर्वसामान्य लोकांकडे आहे, शेवटच्या घटकापर्यंत माझा संपर्क आहे त्यांना अडचण आली की ते फोन करतात. माझा फोन बंद नाही. 

धाराशिव लोकसभा मतदार संघातील पदाधिकारी व कार्यकर्ते यांच्याशी तालुका निहाय बैठक घेऊन संवाद साधला व त्यांची मते जाणून घेतली. ओमराजे व डॉ जयप्रकाश राजे यांनी वडील कै पवनराजे यांच्या समाधीचे दर्शन घेऊन आशीर्वाद घेतले व त्यानंतर बैठक घेतली.

Maharashtra Express News

maharashtraexpressnews.live

The post चर्चा करून निर्णय घेणार – उच्च न्यायालयात न्याय मिळेल, हत्या केली तरी विरोधक संपत नसतो – ओमराजेंच्या बैठकीला सुरुवात appeared first on Maharashtra express news..

लोणी काळभोर, ता. १६ : सेतू सुविधा केंद्राच्या स्थानावरून लोणी काळभोर आणि मांजरी बुद्रुक परिसरात सुरू असलेल्या चर्चेला प्रशासनाने अखेर अधिकृत स्पष्टीकरण दिले आहे. अपर तहसील कार्यालयाची स्वतंत्र प्रशासकीय इमारत उभारल्यानंतर लोणी काळभोर येथे सेतू सुविधा केंद्र सुरू करण्यात येणार असून, तोपर्यंत नागरिकांच्या सोयीसाठी हे केंद्र मांजरी बुद्रुक येथील शासकीय इमारतीत तात्पुरत्या स्वरूपात कार्यरत राहणार असल्याची माहिती अपर तहसीलदार तथा तालुका कार्यकारी दंडाधिकारी तृप्ती कोलते-पाटील यांनी दिली.

लोणी काळभोर ग्रामपंचायतीचे प्रशासक नागेश काळभोर यांनी सेतू सुविधा केंद्राचे कार्यक्षेत्र लोणी काळभोरसाठी मंजूर असताना ते मांजरी बुद्रुक येथे सुरू करण्याबाबत आक्षेप नोंदवत प्रशासनाकडे केंद्र लोणी काळभोरमध्येच सुरू करण्याची मागणी केली होती. या पार्श्वभूमीवर प्रशासनाची भूमिका स्पष्ट करण्यात आली.

तृप्ती कोलते-पाटील यांनी सांगितले की, जिल्हाधिकारी कार्यालयाने २८ ऑक्टोबर २०२५ रोजी सेतू सुविधा केंद्रासाठी पुरवठादार संस्थेची नियुक्ती केली आहे. मात्र, नव्याने सुरू झालेल्या अपर तहसील लोणी काळभोर कार्यालयाकडे स्वतंत्र प्रशासकीय इमारत नसल्याने तसेच उपलब्ध जागा अपुरी असल्यामुळे नागरिकांची गैरसोय टाळण्यासाठी मांजरी बुद्रुक येथील शासकीय इमारतीत तात्पुरते सेतू केंद्र सुरू करण्यात आले आहे.

त्यांनी पुढे सांगितले की, अपर तहसील कार्यालयाच्या कार्यक्षेत्रातील विविध गावांच्या तुलनेत सर्वाधिक अर्ज मांजरी बुद्रुक येथून प्राप्त होत असल्याने तेथे केंद्र सुरू करणे प्रशासनाच्या दृष्टीने अधिक सोयीचे आणि व्यवहार्य ठरले आहे.

लोणी काळभोर ग्रामपंचायत हद्दीत सध्या पाच ‘आपले सरकार सेवा केंद्रे’ (महा-ई-सेवा केंद्रे) कार्यरत आहेत. शासनाच्या निर्णयानुसार प्रत्येक ग्रामपंचायतीत स्वतंत्र सेतू सुविधा केंद्र सुरू करण्यासाठी वर्षभरापूर्वीच आयडी व पासवर्ड उपलब्ध करून देण्यात आले होते. मात्र, सहा महिन्यांहून अधिक कालावधी उलटूनही संबंधित सुविधा सुरू झालेली नसल्याची बाब प्रशासनाने निदर्शनास आणून दिली.

वास्तव परिस्थितीची संपूर्ण माहिती न घेता काही ठिकाणी नागरिक व लोकप्रतिनिधींची दिशाभूल केली जात असल्याचे सांगत, काही माध्यमांतून चुकीची माहिती प्रसारित करून प्रशासनाची बदनामी होत असल्याची खंतही तृप्ती कोलते-पाटील यांनी व्यक्त केली.

दरम्यान, अपर तहसील कार्यालयाची स्वतंत्र प्रशासकीय इमारत उभारल्यानंतर लोणी काळभोर येथेच सेतू सुविधा केंद्र सुरू करण्यात येईल, असा पुनरुच्चार त्यांनी केला. तोपर्यंत नागरिकांच्या सुविधेचा विचार करून मांजरी बुद्रुक येथेच केंद्र सुरू ठेवण्यात येणार असल्याचे त्यांनी स्पष्ट केले.

दुसरीकडे, लोणी काळभोर ग्रामपंचायतीचे प्रशासक नागेश काळभोर यांनी ग्रामपंचायतीकडे सेतू सुविधा केंद्रासाठी आवश्यक जागा उपलब्ध असल्याचा दावा केला आहे. मात्र, जिल्हा परिषदेकडून अधिकृत आयडी आणि पासवर्ड प्राप्त झालेले नसल्याने केंद्र सुरू करता आले नसल्याचे त्यांनी सांगितले. प्रशासनाने तांत्रिक अडचणी तातडीने दूर करून लोणी काळभोर येथेच नागरिकांना स्थानिक पातळीवर सेतू सुविधा उपलब्ध करून द्याव्यात, अशी मागणीही त्यांनी केली.

Maharashtra Express News

maharashtraexpressnews.live

The post प्रशासन म्हणते मांजरी बुद्रुक हा तात्पुरता पर्याय; लोणी काळभोर ग्रामपंचायतीचा केंद्र स्थानिक पातळीवरच सुरू करण्याचा आग्रह” appeared first on Maharashtra express news..

वाकवस्ती (ता. हवेली) प्रतिनिधी : शिवसेना पुणे जिल्हा संघटक निलेश अशोकराव काळभोर यांच्यावर झालेल्या प्राणघातक हल्ला प्रकरणातील आरोपी अद्याप पोलिसांच्या ताब्यात आले नसल्याने संतप्त नागरिक आणि कार्यकर्त्यांनी आता आक्रमक भूमिका घेतली आहे. या पार्श्वभूमीवर वाकवस्ती येथील श्री छत्रपती शिवाजी तरुण मंडळाने लोणी काळभोर पोलीस स्टेशनचे वरिष्ठ पोलीस निरीक्षक यांना निवेदन देऊन आरोपींचा तात्काळ शोध घेऊन कठोर कारवाई करण्याची मागणी केली आहे.

निवेदनानुसार, 18 एप्रिल 2026 रोजी निलेश काळभोर यांच्यावर प्राणघातक हल्ला करण्यात आला होता. या घटनेला बराच कालावधी लोटूनही संबंधित आरोपींना अटक करण्यात आलेली नसल्याचा आरोप करण्यात आला आहे. त्यामुळे परिसरातील नागरिकांमध्ये भीतीचे वातावरण निर्माण झाले असून कायदा-सुव्यवस्थेबाबत प्रश्नचिन्ह उपस्थित होत असल्याचे निवेदनात नमूद करण्यात आले आहे.

मंडळाच्या पदाधिकाऱ्यांनी म्हटले आहे की, निलेश काळभोर हे सामाजिक कार्यात सक्रिय असून विविध जनहिताच्या प्रश्नांसाठी सातत्याने आवाज उठवत असतात. अशा परिस्थितीत त्यांच्यावर हल्ला करणारे आरोपी मोकाट फिरत असल्याने त्यांच्या सुरक्षेचाही प्रश्न निर्माण झाला आहे. भविष्यात त्यांना कोणतीही हानी झाल्यास त्याची जबाबदारी संबंधित यंत्रणांवर राहील, अशी भूमिका निवेदनाद्वारे मांडण्यात आली आहे.

तसेच, पोलिसांनी या प्रकरणाचा सखोल तपास करून आरोपींचा तात्काळ शोध घ्यावा, त्यांच्यावर कायद्यानुसार कठोर कारवाई करावी आणि तपासाची गती वाढवून पीडितांना न्याय मिळवून द्यावा, अशी मागणी करण्यात आली आहे.

या निवेदनाची दखल घेत लोणी काळभोर पोलिसांनी अर्ज स्वीकारला असून संबंधित प्रकरणात आवश्यक ती कार्यवाही करण्यात येईल, अशी अपेक्षा मंडळाच्या वतीने व्यक्त करण्यात आली आहे. दरम्यान, आरोपींना लवकरात लवकर अटक न झाल्यास कार्यकर्त्यांकडून पुढील तीव्र आंदोलनाचा इशाराही दिला जाण्याची शक्यता व्यक्त केली जात आहे.

Maharashtra Express News

maharashtraexpressnews.live

The post निलेश काळभोर हल्ला प्रकरणातील आरोपी अद्याप फरार; तात्काळ अटकेसाठी शिवछत्रपती तरुण मंडळाचे पोलिसांना निवेदन appeared first on Maharashtra express news..

 रिक्षाचालका विरुद्ध पोक्सो अंतर्गत गुन्हा

भोर, प्रतिनिधी : शाळेतून घरी परतत असलेल्या अल्पवयीन मुलीचा विनयभंग केल्याप्रकरणी एका रिक्षाचालकाविरुद्ध भोर पोलीस ठाण्यात पोक्सो कायद्यासह विविध कलमान्वये गुन्हा दाखल करण्यात आला आहे.

पोलीसांनी दिलेल्या माहितीनुसार, 9 जून रोजी सकाळी सुमारे 11 वाजण्याच्या सुमारास पीडित मुलगी शाळेचे तास संपल्यानंतर घरी जात होती. यावेळी आरोपी विजय साळेकर (रा. ता. भोर, जि. पुणे) याने रस्त्यात रिक्षा आडवी लावून मुलीला अडवले. त्यानंतर तिचा हात पकडून तिला जबरदस्तीने रिक्षाकडे ओढले आणि रिक्षामध्ये बसण्यास सांगितले, असा आरोप फिर्यादीत करण्यात आला आहे.

तसेच आरोपीने मुलीशी अयोग्य स्वरूपाचे संभाषण करून तिच्या मनात भीती व लज्जा निर्माण होईल असे कृत्य केल्याचेही फिर्यादीत नमूद आहे. या घटनेनंतर पीडितेच्या वडिलांनी भोर पोलीस ठाण्यात तक्रार दाखल केली.

तक्रारीवरून भोर पोलीस ठाण्यात गुन्हा रजिस्टर क्रमांक 138/2026 अन्वये भारतीय न्याय संहिता (BNS) कलम 126(2), 74 तसेच पोक्सो कायद्याच्या कलम 8 व 12 अंतर्गत गुन्हा दाखल करण्यात आला आहे.

या प्रकरणाचा पुढील तपास महिला पोलीस उपनिरीक्षक खोत करीत असून पोलीस निरीक्षक निलेश माने यांच्या मार्गदर्शनाखाली तपास सुरू आहे. आरोपीविरुद्ध कठोर कारवाई करण्याची मागणी नागरिकांकडून होत आहे.

Maharashtra Express News

maharashtraexpressnews.live

The post शाळेतून घरी जात असलेल्या अल्पवयीन मुलीचा विनयभंग  appeared first on Maharashtra express news..

ग्रामीण भागातील हजारो नागरिकांना होणारा त्रास टाळण्यासाठी ग्रामपंचायतीचे निवेदन; शासनाच्या सेवांसाठी अतिरिक्त अंतर प्रवास करावा लागणार असल्याची चिंता

लोणी काळभोर, ता. ५ जून :

लोणी काळभोर तहसील कार्यक्षेत्रासाठी मंजूर करण्यात आलेले सेतू सुविधा केंद्र पुणे महानगरपालिका हद्दीतील मांजरी बुद्रुक येथे स्थलांतरित करण्याच्या प्रस्तावाला लोणी काळभोर ग्रामपंचायतीने कडाडून विरोध दर्शविला आहे. याबाबत ग्रामपंचायतीने जिल्हाधिकारी, पुणे यांना निवेदन देत हे केंद्र लोणी काळभोरमध्येच सुरू करण्याची मागणी केली आहे.

ग्रामपंचायतीने दिलेल्या निवेदनानुसार, सेतू सुविधा केंद्र हे नागरिकांना विविध शासकीय सेवा, दाखले, प्रमाणपत्रे आणि ऑनलाइन सुविधा सहज उपलब्ध करून देण्यासाठी सुरू करण्यात येते. मात्र मंजूर केंद्र लोणी काळभोरऐवजी मांजरी बुद्रुक येथे हलविण्यात आल्यास लोणी काळभोर व परिसरातील ग्रामीण नागरिकांना मोठ्या प्रमाणात गैरसोय सहन करावी लागणार आहे.

निवेदनात नमूद करण्यात आले आहे की, लोणी काळभोर परिसर हा मोठ्या लोकसंख्येचा ग्रामीण भाग असून येथे सेतू सुविधा केंद्राची नितांत आवश्यकता आहे. केंद्र मंजरी बुद्रुक येथे गेल्यास नागरिकांना शासकीय सेवांसाठी अतिरिक्त अंतराचा प्रवास करावा लागेल. त्यामुळे वेळ, पैसा आणि श्रम यांचा अनावश्यक भुर्दंड नागरिकांवर पडणार आहे.

विशेष म्हणजे, लोणी काळभोर ग्रामपंचायतीकडे केंद्र सुरू करण्यासाठी आवश्यक जागा उपलब्ध असल्याचेही निवेदनात स्पष्ट करण्यात आले आहे. त्यामुळे नागरिकांच्या सोयीचा विचार करून मंजूर सेतू सुविधा केंद्राचे स्थलांतर न करता ते लोणी काळभोरमध्येच कार्यान्वित करावे, अशी ठाम मागणी ग्रामपंचायतीने प्रशासनाकडे केली आहे.

“नागरिकांच्या सोयीपेक्षा स्थलांतराला प्राधान्य का?” असा प्रश्न उपस्थित करत ग्रामपंचायतीने जिल्हा प्रशासनाने या विषयात तातडीने हस्तक्षेप करून ग्रामीण जनतेच्या हिताचा निर्णय घ्यावा, अशी अपेक्षा व्यक्त केली आहे.

Maharashtra Express News

maharashtraexpressnews.live

The post लोणी काळभोरमधील मंजूर सेतू सुविधा केंद्र मांजरी बुद्रुकला हलविण्यास ग्रामपंचायतीचा तीव्र विरोध appeared first on Maharashtra express news..

PMRDAच्या आदेशाचे उल्लंघन; लोणी काळभोरच्या उद्योजकावर गुन्हा दाखल, जिल्हाधिकाऱ्यांचे फौजदारी कारवाईचे स्पष्ट निर्देश

लोणी काळभोर, ता. ५ (प्रतिनिधी) : पुणे महानगर प्रदेश विकास प्राधिकरणाच्या (PMRDA) वारंवार नोटिसा आणि आदेशांकडे दुर्लक्ष करून अनधिकृत बांधकाम सुरू ठेवल्याप्रकरणी कदमवाकवस्ती (ता. हवेली) येथील उद्योजक हेमंत हाडके यांच्याविरोधात लोणी काळभोर पोलिस ठाण्यात गुन्हा दाखल करण्यात आला आहे. या कारवाईमुळे पूर्व हवेली परिसरातील अनधिकृत बांधकामे आणि बेकायदेशीर प्लॉटिंग प्रकरणांवर प्रशासनाचा फास अधिक आवळला जाणार असल्याची चर्चा सुरू झाली आहे.

PMRDAच्या अनधिकृत बांधकाम निर्मूलन व निष्कासन विभागातील शाखा अभियंता प्रणव दिलीप डेंगळे यांनी याबाबत फिर्याद दिली आहे. त्यानुसार महाराष्ट्र प्रादेशिक नियोजन व नगररचना अधिनियम, १९६६ च्या कलम ५४ अन्वये संबंधितांविरोधात फौजदारी गुन्हा दाखल करण्यात आला आहे.

पोलिसांनी दिलेल्या माहितीनुसार, कदमवाकवस्ती येथील गट क्रमांक ४७७ मधील बांधकामाबाबत PMRDAकडे तक्रार प्राप्त झाली होती. त्यानंतर २७ मार्च २०२६ रोजी अधिकाऱ्यांनी स्थळ पाहणी केली असता संबंधित ठिकाणी आवश्यक परवानग्यांशिवाय बांधकाम सुरू असल्याचे निदर्शनास आले.

यानंतर PMRDAने ६ एप्रिल २०२६ रोजी बांधकाम तात्काळ थांबविण्याची नोटीस बजावली होती. मात्र, सुनावणी प्रक्रिया सुरू असतानाही बांधकाम सुरूच ठेवण्यात आल्याचा आरोप फिर्यादीत करण्यात आला आहे. तसेच आवश्यक कागदपत्रे सादर करण्यातही संबंधित अपयशी ठरल्याचे नमूद करण्यात आले आहे.

PMRDAचे पदनिर्देशित अधिकारी तथा तहसीलदार रविंद्र रांजणे यांच्या आदेशानुसार या प्रकरणाची गंभीर दखल घेण्यात आली. २७ मार्च ते २ जून २०२६ या कालावधीत प्रशासनाच्या आदेशाचे उल्लंघन केल्याचा ठपका ठेवत संबंधित विकासकाविरोधात गुन्हा दाखल करण्यात आला आहे.

जिल्हाधिकाऱ्यांचे कडक आदेश; बेकायदेशीर प्लॉटिंग करणारेही रडारवर

दरम्यान, जिल्हाधिकारी कार्यालयाने जिल्ह्यात वाढत्या अनधिकृत बांधकामे आणि बेकायदेशीर प्लॉटिंग प्रकरणांची गंभीर दखल घेतली असून, परवानगीविना प्लॉटिंग करून नागरिकांची फसवणूक करणाऱ्यांविरोधात कठोर कारवाई करण्याचे निर्देश संबंधित महसूल, नगररचना व पोलिस यंत्रणांना दिल्याची माहिती समोर आली आहे.

विशेष म्हणजे, अनधिकृत प्लॉटिंग करून भूखंड विक्री करणारे, जाहिरातींद्वारे नागरिकांना आकर्षित करणारे तसेच शासनाची दिशाभूल करणाऱ्या विकासकांविरोधात फौजदारी गुन्हे दाखल करण्याचे आदेश जिल्हाधिकाऱ्यांनी जारी केल्याची चर्चा प्रशासनिक वर्तुळात सुरू आहे. त्यामुळे पूर्व हवेलीसह जिल्ह्यातील अनेक कथित प्लॉटिंग प्रकल्पांच्या चौकशीची शक्यता निर्माण झाली आहे.

पूर्व हवेलीतील अनेक प्रकल्प प्रशासनाच्या रडारवर?

कदमवाकवस्ती, लोणी काळभोर, उरुळी कांचन, थेऊर, कुंजीरवाडी आणि पूर्व हवेली परिसरात मोठ्या प्रमाणात बांधकामे व प्लॉटिंग प्रकल्प सुरू असल्याची चर्चा आहे. एका विकासकावर गुन्हा दाखल झाल्यानंतर इतर कथित अनधिकृत प्रकल्पांवरही PMRDA, महसूल विभाग आणि जिल्हा प्रशासन कारवाईचा बडगा उगारणार का, याकडे नागरिकांचे लक्ष लागले आहे.

प्रशासनाचा स्पष्ट इशारा

अनधिकृत बांधकामे तसेच बेकायदेशीर प्लॉटिंग यापुढे खपवून घेतले जाणार नाही, असा स्पष्ट संदेश या कारवाईतून देण्यात आला आहे. नोटीस बजावल्यानंतरही आदेशांचे उल्लंघन करणाऱ्यांवर फौजदारी गुन्हे दाखल करण्याचा इशारा प्रशासनाने दिला असून, त्यामुळे संबंधित बांधकाम व्यावसायिक आणि प्लॉटिंग व्यावसायिकांमध्ये मोठी खळबळ उडाली आहे.

जिल्हाधिकारी कार्यालयाचे स्पष्ट निर्देश; अनधिकृत प्लॉटिंग कायमस्वरूपी बंद करून गुन्हे दाखल करण्याचे आदेश

जिल्हाधिकारी कार्यालय, पुणे येथून महसूल शाखेमार्फत जारी करण्यात आलेल्या आदेशानुसार, लोणी काळभोर परिसरातील गट क्रमांक 22/2, 2/2, 367 व 272 मध्ये मोठ्या प्रमाणात सुरू असलेल्या कथित अनधिकृत प्लॉटिंगची गंभीर दखल घेण्यात आली आहे. 

संबंधित तक्रारीच्या अनुषंगाने चौकशी करून सदर अनधिकृत ले-आऊट कायमस्वरूपी बंद करण्यासह संबंधितांवर फौजदारी गुन्हे दाखल करण्याबाबत आवश्यक कार्यवाही करण्याचे निर्देश प्रशासनाने दिले आहेत.

तक्रारदार सौ. सविता नितीन जगताप व इतरांनी केलेल्या तक्रारीनंतर हा विषय जिल्हाधिकारी कार्यालयापर्यंत पोहोचला असून, महसूल विभागाला तत्काळ चौकशी करून अहवाल सादर करण्यास सांगण्यात आले आहे. त्यामुळे पूर्व हवेली परिसरातील अनधिकृत प्लॉटिंग प्रकरणांवर प्रशासनाचा दबाव वाढल्याचे मानले जात आहे.

Maharashtra Express News

maharashtraexpressnews.live

The post अनधिकृत बांधकामांसह बेकायदेशीर प्लॉटिंग करणाऱ्यांवरही आता गाजणार कारवाईचा बडगा! appeared first on Maharashtra express news..

यवत, ता. ३ : गर्भलिंग निदानाच्या अवैध प्रकाराविरोधात यवत पोलिसांनी दाखल केलेल्या गुन्ह्याच्या तपासात महत्त्वाची प्रगती झाली असून मुख्य आरोपीसह चौघांविरुद्ध कारवाई करण्यात आली आहे. या प्रकरणात वापरण्यात आलेली गर्भलिंग निदानाची मशीन जप्त करण्यात आली असून आणखी दोन आरोपींचा शोध सुरू आहे.

याबाबत पोलिसांनी दिलेल्या माहितीनुसार, डॉक्टर सचिन विठ्ठल गुजर (रा. मांजरी, पुणे) यांना १४ मे रोजी एका महिलेची अवैधरित्या गर्भलिंग निदान तपासणी केली जात असल्याचा व्हिडिओ प्राप्त झाला होता. संबंधित व्हिडिओची पडताळणी केल्यानंतर त्यामध्ये आण्णासाहेब गिरी (रा. केडगाव, ता. दौंड, मूळ रा. हंगा, ता. पारनेर, जि. अहिल्यानगर) हा गर्भलिंग निदान करत असल्याचे स्पष्ट झाल्याने १९ मे रोजी यवत पोलिस ठाण्यात गर्भधारणा पूर्व व प्रसवपूर्व निदान तंत्र (पीसीपीएनडीटी) कायद्यान्वये गुन्हा दाखल करण्यात आला.

तपासादरम्यान २० मे रोजी मुख्य आरोपी आण्णासाहेब गिरी याला अटक करण्यात आली. न्यायालयाने त्याला टप्प्याटप्प्याने एकूण १३ दिवसांची पोलिस कोठडी मंजूर केली होती. चौकशीत आरोपीने अतुल अंकुश जाधव (रा. लोहगाव-वाघोली) व नरेंद्र साहेबराव ठाकरे (रा. केसनंद, ता. हवेली) यांचाही या रॅकेटमध्ये सहभाग असल्याची माहिती दिली. त्यानुसार त्यांना आरोपी करण्यात आले असून अतुल जाधव याला २४ मे रोजी अटक करण्यात आली.

याशिवाय मंदार सुरेश माळी (रा. किकवी, ता. भोर) आणि सुंदरम कदम (रा. उरुळी कांचन, ता. हवेली) यांचाही सहभाग समोर आल्याने त्यांच्याविरुद्धही गुन्हा दाखल करण्यात आला आहे. मात्र हे दोघे अद्याप फरार असून पोलिसांकडून त्यांचा शोध सुरू आहे.

तपासादरम्यान मुख्य आरोपीकडून गर्भलिंग निदानासाठी वापरण्यात येणारी मशीन जप्त करण्यात आली. तसेच २४ मे रोजी संबंधित व्हिडिओ जप्त करण्यात आला. व्हिडिओची पंचांसमक्ष पडताळणी केली असता आरोपी गिरी याने स्वतःच गर्भलिंग निदान करत असल्याची कबुली दिल्याचे पोलिसांनी सांगितले.

या गुन्ह्यात एकापेक्षा अधिक आरोपींचा सहभाग निष्पन्न झाल्याने भारतीय न्याय संहितेचे कलम ३(५) वाढीव स्वरूपात लावण्यात आले आहे. तसेच मुलाचा जन्म होण्यापूर्वीच त्याला प्रतिबंध करण्याच्या उद्देशाने कृत्य केल्याचा संशय असल्याने कलम ९१ देखील वाढविण्यात आले आहे.

आतापर्यंत १५ साक्षीदारांचे जबाब नोंदविण्यात आले असून त्यापैकी एका साक्षीदाराचा जबाब बीएनएसएस कलम १८३ अन्वये न्यायालयासमोर नोंदविण्यात आला आहे. आरोपींच्या बँक व्यवहारांची माहिती, मोबाईल कॉल डिटेल रेकॉर्ड (सीडीआर) आणि अन्य तांत्रिक पुराव्यांचे विश्लेषण सुरू असल्याचे पोलिसांनी सांगितले.

दरम्यान, या प्रकरणातील आरोपी नरेंद्र ठाकरे हा वाघोली पोलिस ठाण्यातील तत्सम गुन्ह्यात सध्या न्यायालयीन कोठडीत असून त्याचा ताबा घेण्याची प्रक्रिया सुरू आहे.

या गुन्ह्याचा पुढील तपास पोलिस अधीक्षक संदीप सिंह गिल, अपर पोलिस अधीक्षक गणेश बिरादार आणि उपविभागीय पोलिस अधिकारी बापुराव दडस यांच्या मार्गदर्शनाखाली यवत पोलिस ठाण्याचे अधिकारी करीत आहेत.

Maharashtra Express News

maharashtraexpressnews.live

The post यवतमध्ये गर्भलिंग निदान प्रकरणाचा तपास वेगात; मुख्य आरोपीसह चौघांवर गुन्हा appeared first on Maharashtra express news..