यवत, ता. ३ : गर्भलिंग निदानाच्या अवैध प्रकाराविरोधात यवत पोलिसांनी दाखल केलेल्या गुन्ह्याच्या तपासात महत्त्वाची प्रगती झाली असून मुख्य आरोपीसह चौघांविरुद्ध कारवाई करण्यात आली आहे. या प्रकरणात वापरण्यात आलेली गर्भलिंग निदानाची मशीन जप्त करण्यात आली असून आणखी दोन आरोपींचा शोध सुरू आहे.

याबाबत पोलिसांनी दिलेल्या माहितीनुसार, डॉक्टर सचिन विठ्ठल गुजर (रा. मांजरी, पुणे) यांना १४ मे रोजी एका महिलेची अवैधरित्या गर्भलिंग निदान तपासणी केली जात असल्याचा व्हिडिओ प्राप्त झाला होता. संबंधित व्हिडिओची पडताळणी केल्यानंतर त्यामध्ये आण्णासाहेब गिरी (रा. केडगाव, ता. दौंड, मूळ रा. हंगा, ता. पारनेर, जि. अहिल्यानगर) हा गर्भलिंग निदान करत असल्याचे स्पष्ट झाल्याने १९ मे रोजी यवत पोलिस ठाण्यात गर्भधारणा पूर्व व प्रसवपूर्व निदान तंत्र (पीसीपीएनडीटी) कायद्यान्वये गुन्हा दाखल करण्यात आला.

तपासादरम्यान २० मे रोजी मुख्य आरोपी आण्णासाहेब गिरी याला अटक करण्यात आली. न्यायालयाने त्याला टप्प्याटप्प्याने एकूण १३ दिवसांची पोलिस कोठडी मंजूर केली होती. चौकशीत आरोपीने अतुल अंकुश जाधव (रा. लोहगाव-वाघोली) व नरेंद्र साहेबराव ठाकरे (रा. केसनंद, ता. हवेली) यांचाही या रॅकेटमध्ये सहभाग असल्याची माहिती दिली. त्यानुसार त्यांना आरोपी करण्यात आले असून अतुल जाधव याला २४ मे रोजी अटक करण्यात आली.

याशिवाय मंदार सुरेश माळी (रा. किकवी, ता. भोर) आणि सुंदरम कदम (रा. उरुळी कांचन, ता. हवेली) यांचाही सहभाग समोर आल्याने त्यांच्याविरुद्धही गुन्हा दाखल करण्यात आला आहे. मात्र हे दोघे अद्याप फरार असून पोलिसांकडून त्यांचा शोध सुरू आहे.

तपासादरम्यान मुख्य आरोपीकडून गर्भलिंग निदानासाठी वापरण्यात येणारी मशीन जप्त करण्यात आली. तसेच २४ मे रोजी संबंधित व्हिडिओ जप्त करण्यात आला. व्हिडिओची पंचांसमक्ष पडताळणी केली असता आरोपी गिरी याने स्वतःच गर्भलिंग निदान करत असल्याची कबुली दिल्याचे पोलिसांनी सांगितले.

या गुन्ह्यात एकापेक्षा अधिक आरोपींचा सहभाग निष्पन्न झाल्याने भारतीय न्याय संहितेचे कलम ३(५) वाढीव स्वरूपात लावण्यात आले आहे. तसेच मुलाचा जन्म होण्यापूर्वीच त्याला प्रतिबंध करण्याच्या उद्देशाने कृत्य केल्याचा संशय असल्याने कलम ९१ देखील वाढविण्यात आले आहे.

आतापर्यंत १५ साक्षीदारांचे जबाब नोंदविण्यात आले असून त्यापैकी एका साक्षीदाराचा जबाब बीएनएसएस कलम १८३ अन्वये न्यायालयासमोर नोंदविण्यात आला आहे. आरोपींच्या बँक व्यवहारांची माहिती, मोबाईल कॉल डिटेल रेकॉर्ड (सीडीआर) आणि अन्य तांत्रिक पुराव्यांचे विश्लेषण सुरू असल्याचे पोलिसांनी सांगितले.

दरम्यान, या प्रकरणातील आरोपी नरेंद्र ठाकरे हा वाघोली पोलिस ठाण्यातील तत्सम गुन्ह्यात सध्या न्यायालयीन कोठडीत असून त्याचा ताबा घेण्याची प्रक्रिया सुरू आहे.

या गुन्ह्याचा पुढील तपास पोलिस अधीक्षक संदीप सिंह गिल, अपर पोलिस अधीक्षक गणेश बिरादार आणि उपविभागीय पोलिस अधिकारी बापुराव दडस यांच्या मार्गदर्शनाखाली यवत पोलिस ठाण्याचे अधिकारी करीत आहेत.

Maharashtra Express News

maharashtraexpressnews.live

The post यवतमध्ये गर्भलिंग निदान प्रकरणाचा तपास वेगात; मुख्य आरोपीसह चौघांवर गुन्हा appeared first on Maharashtra express news..

विषारी दारू प्रकरणात मिथेनॉल पुरवले कोणी? पुण्यातील १०० कंपन्या प्रशासनाच्या रडारवर !

ऑनलाइन खरेदीतून आलेल्या मिथेनॉलमुळे १७ बळी; राज्यभर विशेष तपासणी मोहीम सुरू

पुणे, प्रतिनिधी : पुणे जिल्ह्यातील हडपसर, फुगेवाडी आणि पिंपरी-चिंचवड परिसरात मिथेनॉलमिश्रित गावठी दारूमुळे झालेल्या मृत्यूंनी संपूर्ण महाराष्ट्र हादरला आहे. या गंभीर घटनेनंतर अन्न व औषध प्रशासन (FDA) आता राज्यभरातील मिथेनॉल उत्पादक व पुरवठादार कंपन्यांची व्यापक चौकशी करीत असून, पुणे जिल्ह्यातील तब्बल १०० परवानाधारक मिथेनॉल कंपन्या प्रशासनाच्या रडारवर आल्या आहेत.

तपासात समोर आलेल्या माहितीनुसार, विषारी दारू तयार करण्यासाठी वापरण्यात आलेले सुमारे १६५ लिटर मिथेनॉल ऑनलाइन माध्यमातून खरेदी करण्यात आले होते. त्यामुळे रसायनांच्या ऑनलाइन विक्रीवरील नियंत्रणाचा प्रश्न पुन्हा एकदा ऐरणीवर आला आहे.

अन्न व औषध प्रशासनाने आता केवळ या एका घटनेपुरती चौकशी मर्यादित न ठेवता, राज्यभरातील सर्व मिथेनॉल उत्पादक, विक्रेते आणि पुरवठादारांच्या नोंदींची सखोल तपासणी सुरू केली आहे. कंपन्यांनी मिथेनॉलची खरेदी, विक्री आणि साठवणुकीच्या नोंदी कायद्यानुसार व्यवस्थित ठेवल्या आहेत का, तसेच औषधनिर्मितीव्यतिरिक्त अन्य कोणाला बेकायदेशीररीत्या मिथेनॉल विक्री करण्यात आली आहे का, याची पडताळणी केली जाणार आहे.

नियमांचे उल्लंघन करणाऱ्या कोणत्याही कंपनीवर कठोर कारवाई करण्यात येईल, असे संकेत वरिष्ठ अधिकाऱ्यांनी दिले आहेत.

मिथेनॉल म्हणजे काय?

मिथेनॉलला “वूड अल्कोहोल” असेही म्हटले जाते. हे अत्यंत विषारी आणि जीवघेणे रसायन असून औद्योगिक क्षेत्रात मोठ्या प्रमाणावर वापरले जाते.

मिथेनॉलचा वापर प्रामुख्याने :

• औषधनिर्मिती उद्योग

• रसायननिर्मिती उद्योग

• ॲसिटिक ॲसिड उत्पादन

• प्लास्टिक व पेंट उद्योग

• रेझिन, सॉल्व्हंट्स आणि डिंक उत्पादन

• स्वच्छता उत्पादने आणि इंधन निर्मिती

यांसाठी केला जातो. मात्र, मानवी शरीरात गेल्यास ते गंभीर विषबाधा निर्माण करून मृत्यूस कारणीभूत ठरू शकते.

मनुष्यबळाची कमतरता ठरत आहे मोठे आव्हान

अन्न व औषध प्रशासनाने तपासणी मोहीम हाती घेतली असली तरी पुणे विभागात अशा तपासणीसाठी केवळ आठ कर्मचारी उपलब्ध आहेत. आवश्यक मनुष्यबळाच्या तुलनेत केवळ २० टक्के कर्मचारी कार्यरत असल्याने तपासणीसाठी मोठा कालावधी लागू शकतो, अशी माहिती विभागाचे सहआयुक्त गिरीश हुकारे यांनी दिली.

फुगेवाडी प्रकरणात मृतांचा आकडा १७ वर

फुगेवाडी विषारी दारू प्रकरणात आणखी एका व्यक्तीचा उपचारादरम्यान मृत्यू झाला असून, मृतांची संख्या आता १७ वर पोहोचली आहे. दरम्यान, दोन जणांची प्रकृती अद्याप चिंताजनक असल्याची माहिती प्रशासनाने दिली आहे.

प्रतिक्रिया

“ऑनलाइन औषधविक्रीप्रमाणेच रसायनांची अनियंत्रित विक्रीही धोकादायक आहे. मिथेनॉलमिश्रित दारूमुळे गेलेले बळी हे सरकारच्या निष्क्रीय धोरणाचे परिणाम आहेत. ऑनलाइन विक्रीवर वेळेत नियंत्रण आणले असते तर ही दुर्घटना टाळता आली असती. अनेक घातक रसायने आणि औषधे आजही सहज उपलब्ध आहेत. यावर कठोर नियंत्रण आणण्यासाठी आम्ही केंद्र सरकारकडे सातत्याने पाठपुरावा करत आहोत.”

— जगन्नाथ शिंदे, अध्यक्ष, द ऑल इंडिया केमिस्ट अँड ड्रगिस्ट असोसिएशन

विशेष प्रश्न

“विषारी दारू तयार करणाऱ्यांपर्यंत मिथेनॉल पोहोचले कसे? ऑनलाइन विक्रीच्या साखळीत नेमका दोषी कोण?”

या प्रश्नांची उत्तरे मिळेपर्यंत प्रशासनाच्या तपासाकडे संपूर्ण राज्याचे लक्ष लागून राहणार आहे.

Maharashtra Express News

maharashtraexpressnews.live

The post विषारी दारू प्रकरणात मिथेनॉल पुरवले कोणी? पुण्यातील १०० कंपन्या प्रशासनाच्या रडारवर ! appeared first on Maharashtra express news..

लोणी काळभोर,ता. २ : पुणे शहर पोलीस दलातील प्रशासकीय बदलांच्या पार्श्वभूमीवर लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांची विश्रांतवाडी पोलीस ठाण्याच्या वरिष्ठ पोलीस निरीक्षकपदी बदली करण्यात आली आहे. त्यांच्या जागी लोणी काळभोर पोलीस ठाण्याच्या (गुन्हे) पोलीस निरीक्षकपदी प्रदीप नागनाथ पवार यांची नियुक्ती करण्यात आली आहे.

यासंदर्भातील आदेश पुणे शहर पोलीस आयुक्त अमितेश कुमार यांनी मंगळवारी (ता. २) रात्री उशिरा जारी केले. महाराष्ट्र पोलीस अधिनियम १९५१ मधील कलम २२ अन्वये पोलीस आस्थापना मंडळ (शहर) यांच्या बैठकीत झालेल्या निर्णयानुसार ही तात्पुरती पदस्थापना करण्यात आली आहे.

पोलीस आयुक्तालयाकडून जारी करण्यात आलेल्या आदेशानुसार, संबंधित अधिकाऱ्यांनी नव्या नियुक्तीच्या ठिकाणी तत्काळ हजर होऊन कार्यभार स्वीकारण्याच्या सूचना देण्यात आल्या आहेत. तसेच कार्यभार स्वीकारल्यानंतरचा अनुपालन अहवाल पोलीस आयुक्त कार्यालयात सादर करण्याचे निर्देशही देण्यात आले आहेत.

दरम्यान, लोणी काळभोर पोलीस ठाण्यात नवीन नेतृत्वाची जबाबदारी स्वीकारणारे प्रदीप पवार यांच्या नियुक्तीकडे परिसरातील नागरिक व पोलीस दलाचे लक्ष लागले असून आगामी काळात कायदा व सुव्यवस्था तसेच गुन्हेगारी नियंत्रणाच्या दृष्टीने त्यांच्या कार्यपद्धतीबाबत उत्सुकता व्यक्त केली जात आहे.

Maharashtra Express News

maharashtraexpressnews.live

The post लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांची बदली; प्रदीप पवार यांच्याकडे सूत्रे appeared first on Maharashtra express news..

उरुळी कांचन, ता. १ जून : पुणे व पिंपरी-चिंचवड परिसराला हादरवून सोडणाऱ्या विषारी हातभट्टी दारूकांडाचे गंभीर पडसाद आता पोलीस यंत्रणेत उमटू लागले आहेत. या प्रकरणात अवैध दारू व्यवसायाशी संबंधित गंभीर आरोपांच्या पार्श्वभूमीवर पुणे ग्रामीणचे पोलीस अधीक्षक संदीपसिंह गिल यांनी उरुळी कांचन पोलीस ठाण्यावर मोठी प्रशासकीय कारवाई करत वरिष्ठ पोलीस निरीक्षक सचिन वांगडे यांची तडकाफडकी पोलीस मुख्यालयात बदली केली आहे.

त्यांच्या जागी कर्तव्यदक्ष आणि धडक कारवायांसाठी ओळखल्या जाणाऱ्या वरिष्ठ पोलीस निरीक्षक विजयमाला पवार यांची उरुळी कांचन पोलीस ठाण्याच्या प्रभारी वरिष्ठ पोलीस निरीक्षकपदी नियुक्ती करण्यात आली आहे. आदेश मिळताच पवार यांनी सोमवारी पदभार स्वीकारून कामकाजाला सुरुवात केली.

विषारी दारू प्रकरणातील मुख्य आरोपी राधेश्याम प्रजापती याच्याशी पोलीस ठाण्यातील काही कर्मचाऱ्यांचे संबंध असल्याचे प्राथमिक तपासात समोर आल्यानंतर पोलीस अधीक्षक संदीपसिंह गिल यांनी रविवारी रात्रीच दोन पोलीस कर्मचाऱ्यांना निलंबित केले होते. त्यानंतर अवघ्या काही तासांत वरिष्ठ निरीक्षकांची उचलबांगडी करण्यात आल्याने पोलीस दलात मोठी खळबळ उडाली आहे.

या कारवाईमुळे अवैध दारू व्यवसाय, गुन्हेगारी आणि त्यांना मिळणारे कथित संरक्षण यावर कठोर संदेश गेल्याची चर्चा परिसरात सुरू आहे. “बेकायदेशीर धंदे आणि त्यांच्याशी संबंधित कोणतेही संगनमत खपवून घेतले जाणार नाही,” असा स्पष्ट इशारा या निर्णयातून पोलीस अधीक्षक संदीपसिंह गिल यांनी दिल्याचे मानले जात आहे.

दरम्यान, उरुळी कांचन परिसरात वाढत चाललेल्या अवैध धंद्यांवर नवनियुक्त वरिष्ठ पोलीस निरीक्षक विजयमाला पवार कोणती भूमिका घेतात, तसेच विषारी दारूच्या जाळ्याविरोधात कोणत्या धडक कारवाया करतात, याकडे नागरिकांसह संपूर्ण जिल्ह्याचे लक्ष लागले आहे.

Maharashtra Express News

maharashtraexpressnews.live

The post विषारी दारूकांडाचे पडसाद! उरुळी कांचनचे वरिष्ठ पोलीस निरीक्षक सचिन वांगडे कंट्रोलला; विजयमाला पवार यांच्याकडे धुरा  appeared first on Maharashtra express news..

खेड शिवापूर, ता. ३० : खेड शिवापूर पोलिस स्टेशनच्या हद्दीतील Palazzo हॉटेलमध्ये अवैधरित्या हुक्का बार सुरू असल्याची चर्चा परिसरात रंगू लागली असून, याबाबत स्थानिक नागरिकांमधून तीव्र संताप व्यक्त केला जात आहे. कायद्याने बंदी असतानाही रात्री उशिरापर्यंत हुक्क्याचा धूर उडत असल्याचे सांगितले जात आहे.

विशेष म्हणजे, सार्वजनिक आरोग्याला धोका निर्माण करणाऱ्या आणि तरुण पिढीला व्यसनाच्या गर्तेत लोटणाऱ्या हुक्का बारविरोधात शासनाने कठोर भूमिका घेतलेली असताना Palazzo हॉटेलमध्ये हा व्यवसाय नेमका कोणाच्या आशीर्वादाने सुरू आहे, असा प्रश्न उपस्थित केला जात आहे.

स्थानिकांच्या मते, हॉटेलमध्ये नियमितपणे तरुणांची गर्दी होत असून, विविध फ्लेवरच्या नावाखाली हुक्क्याचे सेवन खुलेआम सुरू असल्याची माहिती मिळत आहे. याबाबत संबंधित विभागांना माहिती नसणे अशक्य असल्याचे बोलले जात असून, मग संबंधित यंत्रणांचे हे दुर्लक्ष आहे की संगनमत, याबाबत संशय व्यक्त होत आहे.

अवैध हुक्का बारविरोधात वेळोवेळी कारवाया होत असताना Palazzo हॉटेलवरील प्रशासनाची नजर का जात नाही, हा देखील चर्चेचा विषय बनला आहे. कायद्याचा धाक उरला नसल्यानेच अशा प्रकारचे व्यवसाय राजरोसपणे सुरू असल्याची भावना नागरिकांमध्ये निर्माण झाली आहे.

दरम्यान, या प्रकरणत संबंधितांवर कठोर कारवाई करावी, अशी मागणी नागरिकांकडून होत आहे. आता पोलिस प्रशासन आणि संबंधित विभाग या प्रकरणात काय भूमिका घेतात, याकडे सर्वांचे लक्ष लागले आहे.

Maharashtra Express News

maharashtraexpressnews.live

The post खेड शिवापूर पोलिस स्टेशन हद्दीत “Palazzo हॉटेल”मध्ये अवैध हुक्का बारचा धुरळा; संबंधित यंत्रणांचे दुर्लक्ष की संगनमत? appeared first on Maharashtra express news..

पुणे, ता. ३० (प्रतिनिधी) : पुणे आणि पिंपरी-चिंचवड शहराला हादरवून सोडणाऱ्या विषारी गावठी दारूकांडातील मृतांचा आकडा १९ वर पोहोचला असून अनेक जण अजूनही मृत्यूशी झुंज देत आहेत. मात्र या भीषण दुर्घटनेनंतर सर्वसामान्य नागरिकांच्या मनात एकच प्रश्न घोंगावत आहे – “१९ निष्पाप जीव गेल्यानंतरच प्रशासनाला जाग का आली?”

वर्षानुवर्षे सुरू असलेल्या अवैध हातभट्टी आणि गावठी दारूच्या व्यवसायाकडे संबंधित यंत्रणांनी दुर्लक्ष केल्याचा आरोप होत असताना, दुर्घटनेनंतर अचानक कारवाईचा धडाका लावण्यात आला आहे. पोलीस विभाग आणि राज्य उत्पादन शुल्क विभागातील अधिकाऱ्यांवर निलंबनाची कारवाई करण्यात आली असली, तरी एवढ्या मोठ्या जीवितहानीसाठी जबाबदार असलेल्यांवर केवळ निलंबन पुरेसे नसल्याची भावना नागरिकांमध्ये तीव्रतेने व्यक्त होत आहे.

पोलीस आणि उत्पादन शुल्क विभागावर कारवाईचा बडगा

या प्रकरणात कर्तव्यात हलगर्जीपणा आणि निष्काळजीपणाचा ठपका ठेवत पुणे व पिंपरी-चिंचवड पोलीस आयुक्तालयाने एकूण ९ पोलीस अधिकारी व कर्मचाऱ्यांना निलंबित केले आहे. हडपसर पोलीस ठाण्याचे वरिष्ठ पोलीस निरीक्षक संजय मोगले, सहाय्यक पोलीस निरीक्षक हसीना शिकलगार, पोलीस उपनिरीक्षक हसन मुलानी यांच्यासह दापोडी पोलीस ठाण्यातील अनेक अधिकारी व कर्मचाऱ्यांवर कारवाई करण्यात आली आहे. तसेच गुन्हे शाखेचे पोलीस निरीक्षक नरेंद्र ठाकरे यांची नियंत्रण कक्षात बदली करण्यात आली आहे.

दुसरीकडे, राज्य उत्पादन शुल्क विभागातील १३ अधिकाऱ्यांवरही निलंबनाची कारवाई करण्यात आली आहे. त्यामध्ये निरीक्षक, दुय्यम निरीक्षक आणि कर्मचाऱ्यांचा समावेश आहे. अवैध दारूचा व्यवसाय सुरू असताना संबंधित यंत्रणा नेमकी काय करत होती, असा सवाल आता उपस्थित होत आहे.

विषारी दारूने उद्ध्वस्त केली अनेक कुटुंबे

मंगळवारी रात्री आणि बुधवारी सकाळी गावठी दारूचे सेवन केलेल्या अनेक नागरिकांना डोळ्यांची जळजळ, चक्कर येणे, श्वसनाचा त्रास, अंधारी येणे, छातीत दुखणे आणि तोंडातून फेस येणे अशी गंभीर लक्षणे दिसू लागली. अनेकांना तातडीने रुग्णालयात दाखल करण्यात आले; मात्र काहींना उपचार मिळण्यापूर्वीच मृत्यूने गाठले.

फुगेवाडी, दापोडी आणि हडपसर परिसरात घडलेल्या या दुर्घटनेत आतापर्यंत १९ जणांचा मृत्यू झाला आहे. अनेक घरांचे आधारस्तंभ हिरावले गेले असून काही कुटुंबांवर अक्षरशः उपासमारीची वेळ येण्याची भीती निर्माण झाली आहे. या घटनेमुळे संपूर्ण परिसरात संताप आणि हळहळ व्यक्त केली जात आहे.

मिथेनॉल मिसळून दारू विक्रीचा धक्कादायक प्रकार

प्राथमिक तपासात मिथेनॉलसारखे घातक रसायन मिसळून गावठी दारू तयार करण्यात आल्याचे समोर आले आहे. या प्रकरणी मुख्य सूत्रधारासह १० जणांना अटक करण्यात आली असून तपास सीआयडीकडे वर्ग करण्यात आला आहे.

मात्र, केवळ दारू विक्रेत्यांना अटक करून प्रकरण संपणार नसल्याचे नागरिकांचे मत आहे. अवैध धंद्यांकडे डोळेझाक करणारे, तक्रारी असूनही कारवाई न करणारे आणि कथित हप्तेखोरीमुळे संशयाच्या भोवऱ्यात सापडलेले अधिकारी यांचीही चौकशी होऊन त्यांच्यावर कठोर कारवाई व्हावी, अशी मागणी जोर धरत आहे.

निलंबन नव्हे, गुन्हे दाखल करण्याची मागणी

राज्यात हातभट्टी दारूवर बंदी असतानाही अनेक ठिकाणी खुलेआम विक्री होत असल्याच्या तक्रारी सातत्याने समोर येत आहेत. स्थानिक नागरिकांनी वेळोवेळी तक्रारी करूनही प्रभावी कारवाई झाली नसल्याचा आरोप आहे. त्यामुळे या प्रकरणात केवळ निलंबनावर समाधान न मानता, निष्काळजीपणामुळे मृत्यू घडल्याच्या आरोपाखाली संबंधित दोषींवर मनुष्यवधासारखे गंभीर गुन्हे दाखल करावेत, अशी मागणी आता तीव्र होत आहे.

मुख्यमंत्र्यांनी घेतली दखल; राज्याचे लक्ष चौकशीकडे

मुख्यमंत्री Devendra Fadnavis यांनी या प्रकरणाची गंभीर दखल घेत दोषींवर कठोर कारवाईचे संकेत दिले आहेत. मात्र, १९ जणांचे प्राण गेल्यानंतर झालेली कारवाई पुरेशी ठरणार का? की या मृत्यूंसाठी जबाबदार असलेल्या संपूर्ण साखळीला कायद्याच्या कठघऱ्यात उभे केले जाणार? याकडे आता संपूर्ण राज्याचे लक्ष लागले आहे.

जनतेचा संतप्त सवाल

“जर वेळेत कारवाई झाली असती, तर आज १९ कुटुंबांवर दुःखाचा डोंगर कोसळला असता का?”

हा प्रश्न केवळ प्रशासनालाच नव्हे, तर अवैध दारूच्या साखळीला संरक्षण देणाऱ्या प्रत्येक घटकाला विचारला जात आहे. पुण्यातील हे विषारी दारूकांड आता केवळ गुन्हेगारी प्रकरण राहिले नसून, यंत्रणांच्या कार्यक्षमतेवर आणि जबाबदारीवर उभा राहिलेला गंभीर प्रश्न बनला आहे.

Maharashtra Express News

maharashtraexpressnews.live

The post १९ बळी गेल्यानंतर प्रशासन जागे; ९ पोलीस, १३ उत्पादन शुल्क अधिकारी निलंबित… पण मृत्यूंचा खरा जबाबदार कोण? appeared first on Maharashtra express news..

आळंदी (पुणे), प्रतिनिधी : अनुसूचित जातींच्या उपवर्गीकरणाच्या प्रस्तावाविरोधात चर्मकार समाजाने आळंदी येथे एकजुटीचे शक्तिप्रदर्शन करत तीव्र भूमिका घेतली. गुरुवार (दि. २८ मे) रोजी हराळे वैष्णवी समाज धर्मशाळा, आळंदी येथे राज्यभरातील विविध संघटनांचे पदाधिकारी, लोकप्रतिनिधी, समाजसेवक व समाजबांधवांच्या उपस्थितीत झालेल्या महाबैठकीत उपवर्गीकरणाला एकमुखाने विरोध दर्शविण्यात आला.

बैठकीस माजी समाजकल्याण मंत्री बबनराव घोलप, अखिल भारतीय रविदासिया धर्म संघटनेचे राष्ट्रीय अध्यक्ष सुखदेवजी वाघमारे महाराज, राष्ट्रीय चर्मकार संघाचे संस्थापक अध्यक्ष बाबुराव माने, ग्राहक कल्याण व चर्मकार ऐक्य महापरिषदेचे महाराष्ट्र प्रदेशाध्यक्ष सूर्यकांत आप्पा गवळी, वैष्णवी हराळ समाज धर्मशाळेचे अध्यक्ष बाबा कांबळे, माजी आमदार भाऊसाहेब कांबळे, राष्ट्रीय चर्मकार संघाचे मुंबई विभागाध्यक्ष विलास गोरेगावकर यांच्यासह विविध संघटनांचे पदाधिकारी व समाजबांधव मोठ्या संख्येने उपस्थित होते.

बैठकीत अनुसूचित जाती उपवर्गीकरणाच्या मुद्द्यावर सविस्तर चिंतन करण्यात आले. उपवर्गीकरणाला संपूर्ण ताकदीने विरोध करण्यासाठी आणि पुढील लढ्याची दिशा ठरविण्यासाठी विशेष समिती स्थापन करण्याचा निर्णय घेण्यात आला. 

राज्यातील प्रत्येक चर्मकार समाज बांधवाला या न्याय हक्काच्या चळवळीत सहभागी करून घेण्यासाठी व्यापक जनजागृती मोहीम राबविण्यात येणार असल्याचेही यावेळी जाहीर करण्यात आले.

तसेच मुख्यमंत्री आणि उपमुख्यमंत्री यांच्या उपस्थितीत मंत्रालयात चर्मकार समाजाच्या प्रमुख प्रतिनिधींची विशेष बैठक आयोजित करून उपवर्गीकरणासह इतर प्रलंबित प्रश्नांवर चर्चा करावी, असा ठराव सर्वानुमते मंजूर करण्यात आला.

बैठकीत डॉ. बाबासाहेब आंबेडकर यांनी दिलेल्या संविधानाचे संरक्षण करण्याचा निर्धार व्यक्त करण्यात आला. अनुसूचित जातींची एकजूट अबाधित ठेवण्यासाठी चर्मकार समाजाने आंबेडकरी जनसमुदायासह अनुसूचित जातीतील सर्व घटकांसोबत राहण्याचा ठरावही एकमुखाने मंजूर करण्यात आला.

यावेळी शासनाने अनुसूचित जातींचा प्रलंबित बॅकलॉग भरावा, पदोन्नतीची प्रक्रिया तातडीने राबवावी, अशी मागणी करण्यात आली. पुढील महिन्यात होणाऱ्या राज्य विधिमंडळ अधिवेशनादरम्यान मंत्रालयावर राज्यस्तरीय धडक मोर्चा काढण्याची घोषणा करण्यात आली असून, राज्यभरातून लाखो समाजबांधव सहभागी होतील, असा विश्वास आयोजकांनी व्यक्त केला.

याशिवाय आगामी जातीय सर्वेक्षणाबाबत समाजाला मार्गदर्शन करण्याचा निर्णय घेण्यात आला. चर्मकार समाजातील प्रत्येक कुटुंबाचे सर्वेक्षण होणे आवश्यक असून, कोणतेही कुटुंब वंचित राहू नये यासाठी समाजबांधवांनी जागरूक राहण्याचे आवाहन करण्यात आले.

बैठकीतील मान्यवरांचे स्वागत वैष्णवी हराळ समाज धर्मशाळेच्या पदाधिकाऱ्यांनी केले. कार्यक्रमाचे सूत्रसंचालन संतोष कानडे यांनी केले, तर तुषार नेटके आणि अनिल सातपुते यांनी आभार मानले.

Maharashtra Express News

maharashtraexpressnews.live

The post आळंदीत चर्मकार समाजाची महाबैठक; अनुसूचित जाती उपवर्गीकरणाला एकमुखी तीव्र विरोध, राज्यव्यापी आंदोलनाचा इशारा appeared first on Maharashtra express news..

या प्रकरणी आकाश दीपक जाधव (वय ३०, रा. पांढरेमळा, हडपसर) याला पोलिसांनी अटक केली असून त्याच्यासह इतर काही संशयितांना ताब्यात घेण्यात आले आहे. प्राथमिक तपासात विषारी रसायने मिसळून गावठी दारू तयार करून तिची विक्री करण्यात आल्याचे उघड झाले आहे.

मृतांमध्ये राहुल शरद क्षीरसागर, विजय भूकुरलाल शर्मा, अरुण वामन डाडर, दत्ता माधवराव सूर्यवंशी, अशोक रमेश चव्हाण आणि प्रवीण जाधव यांचा समावेश आहे. दारू सेवन केल्यानंतर मळमळ, उलट्या, डोळ्यांवर अंधारी येणे, तोंडाला फेस येणे अशी गंभीर लक्षणे दिसून आली. उपचारासाठी दाखल करण्यात आलेल्या या नागरिकांचा उपचारादरम्यान मृत्यू झाला.

दरम्यान, ही विषारी दारू शहरातील विविध भागात पोहोचल्याची भीती व्यक्त होत असून बाधितांची संख्या वाढण्याची शक्यता वर्तवली जात आहे. या घटनेनंतर संतप्त नागरिक आणि सामाजिक कार्यकर्त्यांनी हडपसरमधील पांढरेमळा व मंत्री मार्केट परिसरातील गावठी दारूचे अड्डे उध्वस्त करत प्रशासनाविरोधात तीव्र नाराजी व्यक्त केली.

स्थानिक यंत्रणांच्या दुर्लक्षामुळे सहा बळी ?

शहरात खुलेआम सुरू असलेल्या हातभट्टी व गावठी दारू व्यवसायाकडे स्थानिक प्रशासन आणि पोलिसांचे दुर्लक्ष झाले का, असा प्रश्न आता उपस्थित केला जात आहे. हडपसर, काळेपडळ, पिसोळी आणि परिसरातील अवैध दारू अड्ड्यांवर तात्काळ कारवाईची मागणी जोर धरत आहे.

दोषींना सोडणार नाही – पोलिस आयुक्त अमितेश कुमार

या प्रकरणात खून आणि दारूबंदी कायद्यांतर्गत गंभीर गुन्हे दाखल करण्यात आले असून सीसीटीव्ही फुटेजची तपासणी सुरू आहे. दोषींविरोधात कठोर कारवाई केली जाईल, असा इशारा पोलिस आयुक्त अमितेश कुमार यांनी दिला आहे.

यासोबतच शहरातील सर्व अवैध धंद्यांवर कारवाई करण्यासाठी आजपासून ‘ऑपरेशन वॉश आउट’ मोहीम राबविण्यात येणार असल्याची माहितीही त्यांनी दिली. मृतांच्या शवविच्छेदनाचा अहवाल आणि न्यायवैद्यक प्रयोगशाळेचा अहवाल आल्यानंतर मृत्यूचे नेमके कारण स्पष्ट होणार आहे.

सहा निष्पाप जीवांचा बळी घेणाऱ्या विषारी दारूच्या या काळ्या साम्राज्याचा बीमोड कधी होणार, हा प्रश्न आता संपूर्ण पुणेकर विचारत आहेत.

Maharashtra Express News

maharashtraexpressnews.live

The post हडपसरमध्ये विषारी गावठी दारूचे थैमान; सहा बळी, अनेकांची प्रकृती गंभीर – अवैध दारू माफियांविरोधात संतापाचा उद्रेक! appeared first on Maharashtra express news..

धाराशिव, ता. २९ : सामाजिक क्षेत्रात केलेल्या उल्लेखनीय कार्याची दखल घेत अखिल भारतीय मराठी साहित्य परिषदेच्या वतीने केतन निकाळजे यांना प्रतिष्ठेचा “राज्यस्तरीय समाजरत्न पुरस्कार” प्रदान करण्यात आला. धाराशिव येथे आयोजित ३२ व्या अखिल भारतीय नवोदित मराठी साहित्य संमेलनाच्या उद्घाटन सोहळ्यात हा पुरस्कार प्रदान करण्यात आला.

विविध सामाजिक उपक्रम, जनहिताची कार्ये आणि समाजासाठी केलेल्या योगदानाची दखल घेऊन त्यांची या पुरस्कारासाठी निवड करण्यात आली होती.

या सन्मानामुळे केतन निकाळजे यांच्या सामाजिक कार्याला राज्यस्तरावर गौरव प्राप्त झाला असून विविध क्षेत्रातील मान्यवरांनी त्यांचे अभिनंदन केले आहे. पुरस्कार स्वीकारल्यानंतर त्यांनी हा सन्मान समाजहितासाठी कार्य करणाऱ्या सर्व सहकाऱ्यांचा असल्याची भावना व्यक्त केली.

या पुरस्कारामुळे सामाजिक कार्यासाठी झटणाऱ्या युवकांना प्रेरणा मिळणार असून केतन निकाळजे यांच्या पुढील वाटचालीसाठी सर्व स्तरांतून शुभेच्छांचा वर्षाव होत आहे.

Maharashtra Express News

maharashtraexpressnews.live

The post सामाजिक कार्याची राज्यस्तरीय दखल; केतन निकाळजे यांना ‘समाजरत्न पुरस्कार’ प्रदान appeared first on Maharashtra express news..

लोणी काळभोर : पूर्व हवेलीतील लोणी काळभोर अपर तहसील कार्यालयात कार्यरत असलेल्या ग्राम महसूल अधिकाऱ्यावर लाच मागितल्याप्रकरणी लाचलुचपत प्रतिबंधक विभागाने (एसीबी) कारवाई करत लोणी काळभोर पोलीस ठाण्यात गुन्हा दाखल केला आहे. या कारवाईमुळे महसूल विभागात खळबळ उडाली आहे.

लाचलुचपत प्रतिबंधक विभागाने दिलेल्या माहितीनुसार, अक्षय शिवाजी कोल्हे (वय २८), पद – ग्राम महसूल अधिकारी, अपर तहसील कार्यालय, लोणी काळभोर, यांच्या विरोधात भ्रष्टाचार प्रतिबंधक कायद्यान्वये गुन्हा दाखल करण्यात आला आहे.

तक्रारदार हे जमीन खरेदी-विक्री व्यवसायाशी संबंधित असून त्यांनी हवेली तालुक्यातील हिंगणगाव येथील शेतजमीन सपाटीकरण, विहीर खोदकाम व पाईपलाईन टाकण्याच्या परवानगीसाठी अपर तहसीलदार कार्यालय, लोणी काळभोर येथे अर्ज केला होता. या अर्जावरील कार्यवाही करून देण्यासाठी अक्षय कोल्हे यांनी सुरुवातीला दोन लाख रुपयांच्या लाचेची मागणी केल्याची तक्रार तक्रारदाराने १ मे २०२६ रोजी एसीबी, पुणे कार्यालयाकडे केली होती.

त्यानंतर एसीबीने २ मे २०२६ रोजी मागणी पडताळणी कारवाई केली. या पडताळणीदरम्यान संबंधित अधिकाऱ्याने तडजोडीअंती एक लाख रुपयांची लाच मागितल्याचे निष्पन्न झाले.

या प्रकरणी अक्षय कोल्हे यांच्या विरोधात लोणी काळभोर पोलीस ठाण्यात भ्रष्टाचार प्रतिबंधक कायद्यान्वये गुन्हा दाखल करण्यात आला असून पुढील तपास लाचलुचपत प्रतिबंधक विभागाकडून सुरू आहे.

महसूल विभागातील अधिकाऱ्यावर झालेल्या या कारवाईमुळे परिसरात चर्चेला उधाण आले असून प्रशासनातील भ्रष्टाचाराचा मुद्दा पुन्हा ऐरणीवर आला आहे.

Maharashtra Express News

maharashtraexpressnews.live

The post दोन लाखांची मागणी, एक लाखांवर तडजोड; अपर तहसील कार्यालय लोणी काळभोर मधील ग्राम महसूल अधिकाऱ्यावर लाचखोरीचा गुन्हा appeared first on Maharashtra express news..