कुंजीरवाडी, (ता. हवेली) : हवेली तालुक्यातील सुप्रसिद्ध हॉटेल व्यावसायिक मा.श्री. संजयनाना हौशीराम कुंजीर यांनी आपल्या दीर्घ अनुभवाच्या बळावर नानाश्री भोजनालय या नव्या रूपातील हॉटेलचे कुंजीरवाडी येथे दि. 9 एप्रिल 2026 रोजी भव्य उद्घाटन केले.

सन 2002 पासून खाद्यसेवेत कार्यरत असलेल्या संजयनाना कुंजीर यांनी विशेषतः नॉनव्हेज प्रेमींसाठी आधुनिक आणि आकर्षक स्वरूपात हे भोजनालय पुन्हा सुरू केले आहे.

🔹 उद्घाटन सोहळ्याचे वैशिष्ट्ये:

उद्घाटन मान्यवरांच्या हस्ते मोठ्या उत्साहात पार पडले

कार्यक्रमास राजकीय, सामाजिक व मनोरंजन क्षेत्रातील मान्यवरांची उपस्थिती

स्थानिक नागरिकांचा उत्स्फूर्त प्रतिसाद लाभला.

🔹 उपस्थित मान्यवर:

सौ. मनिषाताई कटके

मा. आमदार बापूसाहेब पठारे

सौ. पूनमताई चौधरी (महिला आघाडी, भाजपा)

सिनेअभिनेते संजय खापरे

सिनेअभिनेत्री दिपाली चौघुले

फुडीज सोलमेट्स (यूट्यूब) – कुणाल घुले

मा. युवराज नाना काकडे

मा. मनोज तात्या चौधरी

मा. प्रशांतदादा काळभोर

मा. प्रकाश जगताप

🔹 प्रमुख संदेश:

कार्यक्रमाच्या शेवटी आमदार मा. माऊली आबा कटके यांनी उपस्थित मान्यवरांचे आभार मानले आणि नानाश्री भोजनालयाच्या पुढील यशस्वी वाटचालीस शुभेच्छा दिल्या.

The post नानाश्री भोजनालयाचे कुंजीरवाडी येथे भव्य उद्घाटन appeared first on Maharashtra express news..

मुंबई: भारतीय संगीत क्षेत्रातील दिग्गज गायिका, आशा भोसले यांच्या तब्येतीसंदर्भात मोठी अपडेट समोर येत आहे. आशा भोसले यांची प्रकृती बिघडल्याने मुंबईतील प्रसिद्ध ब्रीच कँडी रुग्णालयात दाखल करण्यात आल्याची माहिती आहे.

प्राथमिक माहितीनुसार, त्यांना हृदयविकाराचा सौम्य झटका आल्याचं म्हटलं जात आहे.

शनिवारी म्हणजेच ११ एप्रिल सकाळी आशाताईंच्या छातीत दुखू लागल्यानं आणि अस्वस्थ वाटू लागल्यानं त्यांना तातडीनं रुग्णालयात दाखल करण्यात आलां. रुग्णालयातील तज्ज्ञ डॉक्टरांच्या देखरेखीखाली त्यांच्यावर सध्या उपचार सुरू आहेत. त्यांच्या प्रकृतीबाबत अद्याप अधिकृत मेडिकल बुलेटिन प्रसिद्ध करण्यात आलेलं नाहीए, परंतु डॉक्टरांनी त्यांची प्रकृती स्थिर असल्याचं म्हटलं आहे.

आशा भोसले या ९२ वर्षांच्या असून आजही त्या संगीत क्षेत्रात सक्रिय आहेत. त्यांच्या रुग्णालयात दाखल झाल्याची बातमी सोशल मीडियावर वाऱ्यासारखी पसरताच जगभरातील चाहत्यांनी आणि कलाकारांनी त्या लवकरात लवकर बऱ्या व्हाव्यात यासाठी प्रार्थना केली आहे.

लता दीदींच्या निधनानंतर आशाताईंनी स्वतःला सावरत पुन्हा कामाला सुरुवात केली होती. मात्र, वाढत्या वयामुळं त्यांना प्रकृतीची काळजी घ्यावी लागत आहे. मंगेशकर कुटुंबीयातील सदस्य आणि जवळचे नातेवाईक सध्या रुग्णालयात उपस्थित असल्याची तसंच आशा भोसले यांच्या प्रकृतीत सुधारणा होत असल्याची माहिती सूत्रांकडून मिळत आहे.

The post ज्येष्ठ गायिका आशा भोसले यांना हृदयविकाराचा झटका, ब्रीच कँडी रुग्णालयात उपचार सुरू appeared first on Maharashtra express news..

छ त्रपती संभाजीनगर: छत्रपती संभाजीनगर जिल्ह्यात भरदिवसा वर्दळीच्या पेट्रोल पंपावर प्रियकराने आपल्याच प्रेयसीचा गळा चिरून निर्घृण खून केल्याची धक्कादायक घटना घडली आहे. या घटनेने करमाड परिसरात दहशतीचे वातावरण निर्माण झाले आहे.

गणपती मंदिराशेजारी असलेल्या इंडियन ऑईल पेट्रोल पंपावर आज दुपारी साडेबारा वाजेच्या सुमारास कामावर असलेल्या पूजा सुदाम गावंडे या युवतीची तिच्याच प्रियकराने गळ्यावर चाकूने वार करून हत्या केली. भरवस्तीत आणि लोकांच्या डोळ्यादेखत घडलेल्या या प्रकारामुळे परिसरात खळबळ उडाली आहे.

पूजा गावंडे ही युवती पेट्रोल पंपावर कर्मचारी म्हणून कार्यरत होती. नेहमीप्रमाणे ती आपल्या कामात व्यस्त असताना तिचा प्रियकर सत्यम रावसाहेब गावंडे तिथे आला. दोघांमध्ये सुरुवातीला काही वेळ शाब्दिक चकमक झाली. सत्यमने अचानक आपल्या खिशातून चाकू काढला आणि काही समजण्याच्या आत पूजाच्या गळ्यावर सपासप वार केले. हा हल्ला इतका भीषण होता की प्रचंड रक्तस्त्राव झाल्यामुळे पूजाचा जागीच मृत्यू झाला.

पेट्रोल पंपावर ग्राहकांची वर्दळ असताना ही घटना घडल्याने एकच गोंधळ उडाला. पूजा रक्ताच्या थारोळ्यात कोसळल्यानंतर आरोपी सत्यमने घटनास्थळावरून पळ काढला. घटनेची माहिती मिळताच करमाड पोलीस ठाण्याचे पथक घटनास्थळी दाखल झाले. पोलिसांनी मृतदेह ताब्यात घेऊन उत्तरीय तपासणीसाठी पाठवला आहे. प्राथमिक तपासात हा खून प्रेमप्रकरणातील वादातून किंवा संशयातून झाल्याचा अंदाज वर्तवण्यात येत आहे. पेट्रोल पंपावरील एका व्यक्तीने वाचवण्यासाठी प्रयत्न केला. मात्र, चाकूचा धाक दाखवत आरोपीने त्याला देखील धमकवल्याचे व्हिडीओमध्ये दिसत आहे.

फरार आरोपी सत्यम गावंडेच्या शोधासाठी करमाड पोलिसांनी विशेष पथके रवाना केली आहेत. या घटनेने परिसरात खळबळ उडाली असून नागरिकांमध्ये संतापाचे वातावरण आहे.

The post संभाजीनगरमध्ये पेट्रोल पंपावर भर दिवस चिरला प्रेयसीचा गळा. appeared first on Maharashtra express news..

बारामती : राज्याचे लक्ष लागलेल्या बारामती विधानसभा पोटनिवडणुकीतून (Baramati By Election 2026) काँग्रेसने अखेर माघार घेतली आहे. उपमुख्यमंत्री सुनेत्रा पवार यांच्यासमोर काँग्रेसने आकाश मोरे यांना उमेदवारी दिली होती.

परंतु आज आकाश मोरे यांची उमेदवारी मागे घेण्यात आली आहे. काँग्रेसचे प्रदेशाध्यक्ष हर्षवर्धन सपकाळ यांनी पत्रकार परिषद घेऊन बारामतीच्या पोटनिवडणुकीतून माघार घेत असल्याचं जाहीर केले. पोटनिवडणुकीतील उमेदवारी अर्ज मागे घेण्याचा आज शेवटचा दिवस होता. त्यामुळे आज सकाळपासून राज्यात राजकीय विविध घडामोडी आणि ट्विस्ट पाहायला मिळाले.

हर्षवर्धन सपकाळ काय म्हणाले? (Harshwardhan Sapkal On Baramati By Election 2026)

हर्षवर्धन सपकाळ पत्रकार परिषदेत म्हणाले की, दोन पोटनिवडणूक महाराष्ट्रात होणार आहे. यामध्ये बारामतीकडे सर्वात जास्त लक्ष लागलं आहे. वैचारिक भूमिका म्हणून भाजपला विरोध करण्यासाठी बारामतीच्या पोटनिवडणूकीत अर्ज भरला होता. बारामती नाही तर देशभरात भाजपच्या विरोधात काँग्रेसने भूमिका घेतली होती. एकूण सहा अर्ज बारामतीसाठी आले होते. परंतु शरद पवार गटाचे आमदार रोहित पवारांनी भल्या पहाटे येऊन बारामतीची निवडणूक बिनविरोध करण्यासाठी विनंती केली. अजित पवार यांच्या संदर्भात सहकार्याची भूमिका घ्या अशी विनंती केली. काही जणांनी अपरिपक्व वक्तव्य केली. त्या संदर्भात कुटुंबांनी दिलगिरी व्यक्त केली. शरद पवार आणि सुप्रिया सुळे यांनी ही विनंती आणि सूचना दिल्या, अशी माहिती हर्षवर्धन सपकाळ यांनी दिली. यानंतर सर्व काँग्रेस नेतृत्व यांच्यासोबत चर्चा केली. लढलं पाहिजे ही आमची भूमिका आहे. मात्र संस्कृती आणि संवेदना म्हणून आम्ही बारामतच्या पोटनिवडणुकीतून माघार घेण्याचा निर्णय घेत आहोत, असं हर्षवर्धन सपकाळ यांनी सांगितले.

देवेंद्र फडणवीसांच्या फोनवर हर्षवर्धन सपकाळ काय म्हणाले? (Harshwardhan Sapkal On Devendra Fadnavis)

बारामतीच्या निवडणुकीतून माघार घ्या, यासाठी मुख्यमंत्री देवेंद्र फडणवीसांचा मला फोन आला होता. परंतु देवेंद्र फडणवीस यांचा फोन येण्याचा आणि निर्णय घेण्याचा काहीही संबंध नाही. देवेंद्र फडणवीसांनी संस्कृती हा शब्द वापरला. तसेच माघार घेण्यासाठी अनेकांनी कळकळीची विनंतीही केली, अशी माहिती हर्षवर्धन सपकाळ यांनी दिली. दरम्यान, फडणवीसांनी हर्षवर्धन सपकाळ यांना फोन करुन, बारामती पोटनिवडणुकीबाबत चर्चा केली. उपमुख्यमंत्री सुनेत्रा पवार या बारामतीची पोटनिवडणूक लढवत आहेत, त्यांच्याविरुद्ध काँग्रेसने उमेदवार दिला आहे. मात्र सुनेत्रा पवार यांच्या बिनविरोध निवडीसाठी काँग्रेसने बारामतीतून उमेदवार मागे घ्यावा, अशी विनंती देवेंद्र फडणवीसांनी केली होती.

बारामती विधानसभेसाठी 23 एप्रिलला मतदान- (Baramati By Election 2026)

उपमुख्यमंत्री अजित पवार यांचे 28 जानेवारी 2026 रोजी निधन झाले. त्यांच्या निधनामुळे रिक्त झालेल्या बारामती विधानसभा मतदारसंघात पोटनिवडणुक होत आहे. बारामती विधानसभा मतदारसंघाच्या पोटनिवडणुकीसाठी येत्या 23 एप्रिल रोजी मतदान होईल. त्यानंतर 4 मे रोजी बारामतीच्या पोटनिवडणुकीचा निकाल जाहीर केला जाईल.

The post बारामती पोटनिवडणुकीतून काँग्रेसची माघार; हर्षवर्धन सपकाळ यांची घोषणा ! appeared first on Maharashtra express news..

पुणे : सध्या सुट्ट्यांचा हंगाम सुरु झाला आहे. अनेकजण कडक उन्हापासून थंडावा मिळवण्यासाठी वॉटरपार्कला पंसती देतात. यामुळे मुंबई प्रमाणे पुण्यातील वॉटरपार्कमध्ये देखील पर्यटकांची गर्दी होत आहे.

अशातच पुण्यातील प्रसिद्ध वॉटपार्कमध्ये भयानक दुर्घटना घडली आहे. वॉटर स्लाइडवरुन स्लायडिंग करणाऱ्या पर्यटक महिलेचे अर्धे शरीर कायमस्वरूपी निकामी झाले आहे. या घटनेमुळे एकच खळबळ उडाली आहे. तसेच वॉटरपार्कच्या सुरक्षेबाबत देखील प्रश्नचिन्ह उपस्थित झाले आहे.

पुण्यातीस एका प्रसिद्ध वॉटरपार्कमध्ये सहलीसाठी आलेल्या महिलेचा वॉटर स्लाइडवर अपघात झाला. यात महिलेचे अर्धे शरीर निकामी झाल्याची धक्कादायक घटना समोर आली आहे. या प्रकरणी वॉटरपार्क प्रशासनाविरोधात शिरुर पोलीसांनी गुन्हा दाखल केला आहे. पोलिसांनी वॉटरपार्कचा पंचनामा केला आहे.

अश्विनी संदीप नप्ते (वय 37) असे अपघाता ग्रस्त महिसेले नाव आहे. अश्विनी या करंदी येथे राहणाऱ्या आहे. अश्विनी या आपल्या कुटुंबासह मोराची चिंचोली येथील जय मल्हार कृषी पर्यटन केंद्र वॉटरपार्कमध्ये सहलीसाठी गेल्या होत्या. वॉटर स्लाइडवरून घसरताना पाण्याची पातळी अत्यंत कमी असल्याने त्या जोरात खाली आपटल्या आणि बेशुद्ध पडल्या. घटनेनंतर तातडीची वैद्यकीय सुविधा किंवा रुग्णवाहिका उपलब्ध नसल्यामुळे नातेवाईकांनी त्यांना खाजगी रुग्णवाहिकेतून रुग्णालयात दाखल केले.

तपासणीत त्यांच्या पाठीचे चार मणके तुटल्याचे समोर आले असून डॉक्टरांनी त्यांचे अर्धे शरीर कायमस्वरूपी निकामी झाल्याचे स्पष्ट केले आहे. या गंभीर प्रकारामुळे वॉटरपार्कमधील सुरक्षेच्या उपाययोजनांवर प्रश्नचिन्ह उपस्थित झाले आहे. किरण नप्ते यांच्या फिर्यादीवरून शिरूर पोलीस ठाण्यात वॉटरपार्कचे मालक व व्यवस्थापकांविरोधात गुन्हा दाखल करण्यात आला आहे.

वॉटर पार्कमध्ये बुडून दोन तरुणांचा मृत्यू झाला

काही दिवसांपूर्वी नागपूरच्या क्रेझी कॅसल वॉटर पार्कमध्ये बुडून दोन तरुणांचा मृत्यू झाला होता. 21 वर्षांचा सागर सहस्त्रबुद्धे आणि 19 वर्षांचा अक्षय बिंड यांचा मृत्यू झाला. तर नेहल मोटघरे हा २१ वर्षांचा तरुण अत्यवस्थ झाला होता. या वॉटर पार्कमध्ये ज्या ठिकाणी कृत्रिम लाटा तयार केल्या जातात, तिथे हे तिघेही खेळत होते. तिथेच या दोघांचा बुडून मृत्यू झाल्याचं सांगण्यात आले.. धक्कादायक बाब म्हणजे वॉटर पार्क मध्ये ही दुर्दैवी घटना घडल्यानंतर ही दुपारी चार वाजेपर्यंत वॉटर पार्क आणि घटना घडलेले पूल तसेच सुरु ठेवण्यात आले होते.

The post पुण्यातील प्रसिद्ध वॉटपार्कमध्ये भयानक दुर्घटना; पर्यटक महिलेचे अर्धे शरीर कायमस्वरूपी निकामी appeared first on Maharashtra express news..

लोणी काळभोर, (ता. हवेली) : शहरात गुन्हेगारी वाढली की सर्वसामान्य नागरिकांकडून पोलिसांवर टीका केली जाते. मात्र, पोलिस कोणत्या प्रतिकूल परिस्थितीत काम करत आहेत, याकडे अनेकदा दुर्लक्ष होते.

लोणी काळभोर पोलीस ठाण्यात अलीकडेच ३० ते ३५ हून अधिक अधिकारी व कर्मचाऱ्यांच्या बदल्या करण्यात आल्या आहेत. याशिवाय दोन पोलीस उपनिरीक्षक सेवानिवृत्त झाले आहेत. आधीच मर्यादित मनुष्यबळ असताना झालेल्या या मोठ्या बदल्यांमुळे पोलीस यंत्रणेवर ताण वाढला असून, कामकाजावर त्याचा परिणाम दिसून येत आहे. सध्या उपलब्ध असलेल्या मोजक्या कर्मचाऱ्यांवर अनेक पटींनी जबाबदारी पडत आहे.

नव्याने केवळ काही कर्मचाऱ्यांची नेमणूक करून परिस्थिती नियंत्रणात असल्याचा आभास निर्माण केला जात असला, तरी प्रत्यक्षात पोलीस ठाणे मनुष्यबळाच्या तीव्र कमतरतेशी झुंज देत आहे. “सर्व काही सुरळीत आहे” असा दावा केला जात असला, तरी वास्तव वेगळे चित्र दाखवत आहे. या परिस्थितीचा थेट परिणाम कायदा व सुव्यवस्थेवर होत असल्याचे दिसते.

पोलीस ठाण्याच्या हद्दीत चोरी, वाहनचोरी, पाकीटमारी, मारहाण, खून, खुनाचे प्रयत्न, दरोडे तसेच महिलांवरील अत्याचार आणि विद्यार्थिनींच्या छेडछाडीच्या घटना वाढताना दिसत आहेत. याशिवाय ऑनलाइन व ऑफलाइन फसवणुकीच्या घटनांमध्येही वाढ झाली असून नागरिकांमध्ये भीतीचे वातावरण निर्माण झाले आहे. पार्किंगच्या अपुऱ्या सुविधांमुळे वाहनचोरीचे प्रकार अधिक वाढले आहेत.

गुन्हेगारीवर नियंत्रण ठेवण्यासाठी हद्दीत तीन पोलीस चौक्या कार्यरत आहेत. मात्र, अपुऱ्या मनुष्यबळामुळे या चौक्यांचे कामकाजही प्रभावीपणे चालत नसल्याचे चित्र आहे. प्रत्येक ठिकाणी पुरेसे कर्मचारी नसल्याने गुन्हेगारीवर वचक ठेवणे कठीण जात आहे. त्यामुळे गुन्हेगारांमध्ये पोलिसांविषयी भीती कमी होत असल्याची भावना नागरिक व्यक्त करत आहेत.

‘सदरक्षणाय खलनिग्रहणाय’ या ब्रीदवाक्यानुसार पोलीस आपले कर्तव्य पार पाडत असले, तरी अपुऱ्या साधनसामग्री व मनुष्यबळामुळे त्यांच्यावर प्रचंड ताण निर्माण झाला आहे. दिवस-रात्र सेवा देऊनही अपेक्षित परिणाम साधण्यात अडचणी येत असल्याने पोलिसांची दमछाक होत आहे.

दरम्यान, नागरिकांपुढे महत्त्वाचा प्रश्न निर्माण झाला आहे. लोणी काळभोर पोलीस ठाण्याला आवश्यक मनुष्यबळ कधी मिळणार? वाढत्या गुन्हेगारीला आळा कधी बसणार? प्रशासनाने याकडे तातडीने लक्ष न दिल्यास परिस्थिती आणखी गंभीर होण्याची शक्यता आहे. “स्मार्ट सिटी”च्या घोषणा करण्यापेक्षा प्रत्यक्षात सक्षम व सशक्त पोलीस यंत्रणा उभी करण्याची गरज आता अधिक प्रकर्षाने जाणवत आहे.

The post लोणी काळभोर पोलीस ठाण्यात मनुष्यबळाचा तुटवडा; मोजक्या कर्मचाऱ्यांवर वाढता कामाचा ताण appeared first on Maharashtra express news..

पुणे : सासवड जवळील बोपदेव घाट माची परिसरात (The Forest Restaurant) या हॉटेल मध्ये “अवैध हुक्का बार” मोठ्या प्रमाणात सुरू असल्याचे धक्कादायक व्हिडिओ फुटेज समोर आले आहे. निसर्गरम्य आणि पर्यटनदृष्ट्या महत्त्वाचा असलेला हा परिसर आता बेकायदेशीर कृत्यांचा अड्डा बनत चालल्याची चर्चा स्थानिकांमध्ये जोर धरत आहे.

संध्याकाळ होताच या भागात काही ठिकाणी हुक्का बार उघडपणे सुरू होत असल्याचे दिसून येते. नियमांची पायमल्ली करत तरुण-तरुणींना आकर्षित करण्यासाठी या ठिकाणी विविध फ्लेवर्ड हुक्क्यांची सोय केली जाते. विशेष म्हणजे, या ठिकाणी कोणतीही अधिकृत परवानगी नसतानाही व्यवसाय सुरू असल्याचे स्थानिकांनी सांगितले.

या अवैध हुक्का बारमुळे परिसरात गुन्हेगारी प्रवृत्ती वाढण्याची भीती व्यक्त केली जात आहे. रात्री उशिरापर्यंत सुरू असलेल्या या धंद्यांमुळे शांतता भंग होत असून, स्थानिक नागरिक त्रस्त झाले आहेत. या संबंधित सासवड पोलीस स्टेशन चे वरिष्ठ पोलीस निरीक्षक यांच्याशी संपर्क करण्याचा प्रयत्न केला परंतू त्यांनी या “अवैध हुक्का बार” बाबत प्रतिक्रिया देण्यास टाळाटाळ केली,अनेक वेळा तक्रारी करूनही संबंधित प्रशासन आणि पोलिसांकडून ठोस कारवाई होत नसल्याचा आरोप नागरिकांनी केला आहे.

दरम्यान, आरोग्याच्या दृष्टीनेही हुक्का सेवन अत्यंत घातक असल्याचे तज्ज्ञ सांगतात. तरीही अशा बेकायदेशीर व्यवसायांना पाठीशी घालणाऱ्या घटकांवर कारवाई का होत नाही ? असा सवाल नागरिकांकडून उपस्थित केला जात आहे.

आता तरी प्रशासनाने जागे होऊन या अवैध हुक्का बारवर तात्काळ कारवाई करावी, अन्यथा परिस्थिती आणखी गंभीर होण्याची शक्यता नाकारता येत नाही.

The post सासवड-बोपदेव घाट परिसरात “अवैध हुक्का बार”चा सुळसुळाट; प्रशासन झोपेत, तरुणाई धोक्यात! appeared first on Maharashtra express news..

लोणी काळभोर : लोणी काळभोर (ता. हवेली) येथील बोरकरवस्ती परिसरात आज सकाळी घडलेल्या रिक्षा अपघातानंतर धक्कादायक प्रकार उघडकीस आला असून, रिक्षामध्ये गाईचे मांस सापडल्याने परिसरात एकच खळबळ उडाली आहे. या घटनेमुळे स्थानिक नागरिकांमध्ये संतापाची लाट उसळली असून, काही काळ तणावपूर्ण वातावरण निर्माण झाले होते.

मिळालेल्या प्राथमिक माहितीनुसार, संबंधित रिक्षा फलटण वरून कोंढव्याच्या दिशेने जात असताना अचानक नियंत्रण सुटल्याने टेम्पो ला जाऊन धडकली. अपघातानंतर नागरिकांनी घटनास्थळी धाव घेतली असता रिक्षामध्ये संशयास्पद पिशव्या आढळून आल्या. त्या उघडून पाहिल्यानंतर त्यामध्ये गाईचे मांस असल्याचा संशय व्यक्त करण्यात आला.

घटनेची माहिती मिळताच लोणी काळभोर पोलिसांनी तात्काळ घटनास्थळी दाखल होत परिस्थिती नियंत्रणात आणली. तसेच संबंधित मांस जप्त करून गुन्हा दाखल करण्याची प्रक्रिया लोणी काळभोर पोलीस स्टेशन मध्ये सुरु आहे तसेच याबाबत पोलिसांकडून सखोल चौकशी सुरू आहे.

दरम्यान, या घटनेमुळे परिसरात काही काळ तणावाचे वातावरण निर्माण झाले होते. मात्र, पोलिसांच्या वेळीच हस्तक्षेपामुळे परिस्थिती नियंत्रणात आली. नागरिकांनी अशा प्रकारांवर कठोर कारवाई करण्याची मागणी प्रशासनाकडे केली आहे.

The post लोणी काळभोर बोरकरवस्ती (ता. हवेली) येथे रिक्षा अपघात; गाईचे मांस सापडल्याने परिसरात खळबळ appeared first on Maharashtra express news..

उरुळी कांचन, ता. हवेली : उरुळी कांचन व पूर्व हवेली परिसरात सुरू असलेल्या अवैध मुरुम उत्खनन आणि बेकायदेशीर वाहतुकीने अखेर एका निष्पाप तरुणाचा जीव घेतला आहे. सोरतापवाडी येथे शुक्रवारी (दि. ३) भरधाव वेगाने धावणाऱ्या डंपरने दिलेल्या जोरदार धडकेत एका तरुणाचा जागीच मृत्यू झाला. या दुर्दैवी घटनेमुळे संपूर्ण परिसरात हळहळ व्यक्त होत असून, प्रशासनाच्या निष्क्रियतेवर तीव्र संताप व्यक्त केला जात आहे.

हवेली तालुक्यातील उरुळी कांचन आणि आसपासच्या पूर्व भागात गेल्या काही महिन्यांपासून मोठ्या प्रमाणावर अवैध मुरुम उत्खनन सुरू आहे. डोंगर पोखरून, गायरान जमिनी उद्ध्वस्त करून नियमांची सर्रास पायमल्ली केली जात आहे. या उत्खननातून मिळणारा मुरुम दिवसाढवळ्या आणि रात्रीच्या अंधारात डंपरच्या माध्यमातून पुणे–सोलापूर राष्ट्रीय महामार्गावरून बेकायदेशीरपणे वाहून नेला जात आहे.

विशेष म्हणजे, या वाहतुकीदरम्यान कोणत्याही सुरक्षेच्या नियमांचे पालन केले जात नाही. ओव्हरलोड डंपर, बेदरकार वेग, प्रशिक्षित चालकांचा अभाव, तसेच काही ठिकाणी व्यसनाधीन अवस्थेत वाहन चालविण्याचे प्रकारही उघडकीस येत आहेत. परिणामी, रस्त्यावरून जाणाऱ्या सामान्य नागरिकांच्या जीवितास मोठा धोका निर्माण झाला आहे.

दरम्यान, या अवजड वाहनांच्या सततच्या वर्दळीमुळे सेवा रस्त्यांची अक्षरशः दुरवस्था झाली आहे. ठिकठिकाणी पडलेल्या खड्ड्यांमुळे अपघातांची शक्यता अधिक वाढली असून, स्थानिक नागरिकांना मोठा त्रास सहन करावा लागत आहे.

सर्वात गंभीर बाब म्हणजे, महसूल प्रशासन, प्रादेशिक परिवहन विभाग आणि वाहतूक पोलिस यांच्याकडून या प्रकाराकडे सातत्याने दुर्लक्ष होत असल्याचा आरोप नागरिकांकडून केला जात आहे. वारंवार तक्रारी करूनही ठोस कारवाई होत नसल्याने प्रशासनाच्या भूमिकेवर संशयाचे सावट निर्माण झाले आहे.

या पार्श्वभूमीवर, अवैध मुरुम उत्खनन व वाहतूक तात्काळ बंद करून संबंधितांवर कडक कायदेशीर कारवाई करावी, तसेच रस्ते सुरक्षेसाठी प्रभावी उपाययोजना राबवाव्यात, अशी जोरदार मागणी स्थानिक नागरिकांकडून होत आहे. अन्यथा अशा दुर्दैवी घटनांची पुनरावृत्ती होण्याची भीती व्यक्त केली जात आहे.

The post अवैध मुरुम उत्खननाचा कहर; उरुळी कांचनमध्ये भरधाव डंपरच्या धडकेत तरुणाचा मृत्यू appeared first on Maharashtra express news..

मंचर (पुणे) : मंचर (ता. आंबेगाव) शहरात मानवतेला काळिमा फासणारी धक्कादायक घटना आज, शुक्रवारी (ता.३) सकाळी सुमारे सव्वा आठ वाजण्याच्या सुमारास तपनेश्वर स्मशानभूमीजवळ घडली.

कौटुंबिक वादातून विवाहित महिलेने स्वतःच्या १४ वर्षीय मुलीचा गळा दाबून ती मृत झाल्याचा समज करून घेतल्यानंतर सहा वर्षांच्या मुलाला सोबत घेऊन विहिरीत उडी घेतली. या दुर्दैवी घटनेत सहा वर्षांच्या मुलाचा मृत्यू झाला असून आई व मुलगी जखमी अवस्थेत उपचार घेत आहेत.

नेहाल आशिष बाणखेले (वय ६) असे मृत्यू झालेल्या चिमुकल्याचे नाव आहे. परिज्ञा आशिष बाणखेले (वय १४) ही मुलगी गंभीर जखमी असून तिच्यावर व हर्षदा आशिष बाणखेले (वय ३५) या विवाहितेवरही मंचर उपजिल्हा रुग्णालयात उपचार सुरू आहेत.

घटनेची माहिती मिळताच परिसरातील नागरिक घटनास्थळी धावून आले. विहिरीतून मोठा आवाज आल्याने मंचर नगरपंचायतीचे नगरसेवक वसंतराव बाणखेले, सचिनराव बाणखेले नागरिकांनी तत्काळ मदतकार्य सुरू केले. त्यावेळी महिला व मुलगा पाण्यावर तरंगताना दिसले. संजय वामनराव बाणखेले व गणेश बाणखेले यांनी विहिरीत उतरून दोघांना बाहेर काढले.

त्यांना तत्काळ मंचर उपजिल्हा रुग्णालयात दाखल करण्यात आले. वैद्यकीय अधिकारी डॉ. विवेकानंद फसाले यांनी तपासणी केल्यानंतर नेहाल याचा मृत्यू झाल्याचे घोषित केले. दरम्यान, पती आशिष बाणखेले यांना घटनेची माहिती मिळाल्यानंतर त्यांनी पत्नी हर्षदा यांच्याकडे मुलगी परिज्ञा कुठे आहे, अशी विचारणा केली.

सुरुवातीला हर्षदाने टाळाटाळ केली. मात्र, नंतर तिने लालबाग प्राईड येथील सदनिकेत असल्याचे सांगून किल्ली दिली. सदनिकेचा दरवाजा उघडताच परिज्ञा अत्यावस्थ अवस्थेत आढळून आली. तिला तत्काळ रुग्णालयात दाखल करण्यात आले. प्राथमिक तपासात तिचा गळा दाबण्याचा प्रयत्न झाल्याचे निष्पन्न झाले आहे.

मंचर पोलिस ठाण्याचे वरिष्ठ पोलिस निरीक्षक श्रीकांत कंकाळ, सहाय्यक पोलीस निरीक्षक सुनील बडगुजर व पोलिस नाईक गणेश डावखर यांनी घटनास्थळी भेट देऊन पंचनामा सुरू केला आहे. या घटनेनंतर परिसरात हळहळ व्यक्त होत असून पुढील तपास सुरू आहे.

प्राथमिक माहितीनुसार, कौटुंबिक वादातून गेल्या पाच ते सहा वर्षांपासून हर्षदा या स्वतंत्र राहत होत्या. याप्रकरणी मंचर पोलिस ठाण्यात आशिष लक्ष्मण बाणखेले यांनी या घटनेविषयी फिर्याद दाखल करण्याची प्रक्रिया सुरु केली आहे. पोलिस पथक या प्रकरणी पुढील तपास करीत आहे, असे वरिष्ठ पोलिस निरीक्षक श्रीकांत कंकाळ यांनी सांगितले.

The post पुण्यात काळजाचा थरकाप उडवणारी घटना! पोटच्या मुलीचा गळा दाबून मुलासह आईने विहिरीत मारली उडी, मुलाचा दुर्दैवी अंत ! appeared first on Maharashtra express news..