महाराष्ट्र एक्सप्रेस न्यूज
लोणी काळभोर, दि. ७ : पुणे जिल्ह्यातील पूर्व हवेली मध्ये पुणे सोलापूर महामार्गावरील कवडीपाट, कदमवाकवस्ती, लोणी काळभोर, कुंजीरवाडी, उरुळी कांचन अशा हद्दीमधील पान टपरी, किराणा दुकान अशा विविध ठिकाणी अजूनही सर्रासपणे गुटखा विक्री जोमात सुरू असल्याचे पाहायला मिळत आहे.
पुणे शहर लोणी काळभोर पोलीस स्टेशन अंतर्गत व तसेच उरुळी कांचन पुणे ग्रामीण पोलीस स्टेशन हद्दीमधील ही सर्व गावे असून यामध्ये शाळा, महाविद्यालय असून या गुटखा विक्रीमुळे अनेक विद्यार्थी, तरुण वर्ग व्यसनाधीन होत असून यामुळे गुन्हेगारी वाढत असल्याचे चित्र पाहायला मिळत आहे. या गुटखा विक्रीवर पूर्णपणे बंदी कधी येणार ? कारवाई कोण करणार ? अशा उलट सुलट चर्चा नागरिकांमध्ये होताना दिसत आहे.
गुटखा विक्री सोबत नशीला पानाची ही सर्रास विक्री..!
पुणे सोलापूर महामार्गावरील काही ठिकाणी पानाची विक्री केली जाते यामध्ये नशीला पानाची विक्री केली जाते, यामुळे अनेक तरुणांना या पानाचे व्यसन लागले असल्याचे दिसत आहे. या संपूर्ण गोष्टीकडे प्रशासनाने गांभीर्याने लक्ष घालून योग्य ती कायदेशीर कारवाई करावी अशी नागरिकांची मागणी होताना दिसत आहे. या व्यसनाधीन होत असलेल्या तरुणांमुळे गुन्हेगारी ही मोठ्या प्रमाणात वाढत असल्याचे चित्र समोर येत आहे.
