गणेशोत्सवात इंस्टाग्राम रील काढण्यासाठी पूर्व हवेलीतील नेते मंडळींमध्ये मोठी चढाओढ
लोणी काळभोर (ता. हवेली) – स्थानिक स्वराज्य संस्थांच्या निवडणुकांचे बिगुल वाजल्याने गणेशोत्सवात गणेश मंडळासहित लोणी काळभोर -कदमवाक वस्ती परिसरातील तसेच पूर्व हवेली तालुक्यात नेते मंडळींमध्ये इंस्टाग्राम रिल्सची क्रेज वाढली असल्याचे चित्र परिसरात पाहायला मिळत आहे.
गणेश मंडळांच्या कार्यकर्त्यानाकडून परिसरातील नेते मंडळींना आरतीचा मान देऊन आपल्या मंडळींची आरती नेते मंडळींच्या हस्ते व्हावी यासाठी कार्यकर्ते उत्साही असतात यासाठी प्रत्येक मंडळ नेत्यांना आरतीचे निमंत्रण देऊन त्याच्या हस्ते आरती करण्याचा मान देताना दिसत असून नेते मंडळींना देखील इंस्टाग्राम रिल्सची भुरळ पडली आहे.
आरतीसाठी जाईल त्याठिकाणी आपल्या कार्यकर्त्याला मोबाईल मध्ये व्हिडीओ काढून रिल्स बनवून सोशल मीडियाच्या इंस्टाग्राम,फेसबुक,व्हाट्स अप स्टेटसच्या माध्यमातून झळकताना दिसत आहेत. “इंस्टाग्राम रिल्स” हे गणेशोत्सवासारख्या मोठ्या कार्यक्रमांच्या माध्यमातून जनतेशी जोडले जाण्यासाठी आणि राजकीय संबंध दृढ करण्यासाठी नेतेमंडळींसाठी एक प्रभावी माध्यम बनले आहे.जणू काही नेते मंडळींमध्ये रिल्स बनवण्याची स्पर्धा लागली आहे कि काय असे चित्र पूर्व हवेलीत तयार झाले आहे.
तरूण मतदारांना शक्य तितक्या सर्व मार्गांनी आपलंसं करण्यासाठी राजकीय पक्ष आणि नेतेमंडळी प्रयत्न करत असतात. साधारणपणे मतदारांचा वावर जिथे जास्त असतो, अशा ठिकाणी मार्केटिंग केल्यास सर्वाधिक फायदा मिळतो राजकारणातही हे तत्व लागू पडतं. पूर्वी मोठमोठाल्या सभा, मंडपांमधली गर्दी, कार्यक्रम, सोशल गॅदरिंग, बैठका अशा ठिकाणी ही मतदार मंडळी सापडायची, पण आता हीच मंडळी इंस्टाग्राम रिल्स रूपांनी मतदारांना सोशल मीडियावर दिसत आहेत. या सर्वांचे “क्रिएटिव्ह रील्स” तयार होत करून मंडळाच्या आरतीचे रील काढण्यासाठी पूर्व हवेलीतील नेते मंडळींमध्ये मोठी चढाओढ दिसत आहे.
