Loni Kalbhor : पुणे शहर पोलीस दलात मोठी खळबळ उडवणारी बातमी समोर आली असून लोणी काळभोर पोलीस ठाण्यात बदल्यांचा अक्षरशः धमाका झाला आहे.
प्रशासकीय कारणास्तव एकाच वेळी तब्बल ३२ कर्मचाऱ्यांच्या बदल्या करण्यात आल्या आहेत. हे आदेश पुणे शहर पोलीस आयुक्त अमितेश कुमार यांनी बुधवारी (ता. १८) रात्री उशिरा परिपत्रकाद्वारे जारी केले.
एकाच ठाण्यातील एवढ्या मोठ्या संख्येने कर्मचाऱ्यांच्या बदल्या झाल्याने संपूर्ण पुणे शहर पोलिस दलात जोरदार चर्चा रंगली आहे. या निर्णयामागील नेमके कारण काय? अचानक एवढ्या मोठ्या प्रमाणावर हालचाल का? याबाबत तर्क-वितर्काना उधाण आले आहे.
दरम्यान, बहुसंख्य कर्मचाऱ्यांची बदली लोहगाव, विमानतळ, चंदननगर आणि सिंहगड रोड पोलीस ठाण्यांमध्ये करण्यात आली आहे. विशेष म्हणजे लोहगाव व विमानतळ पोलीस ठाण्यांकडे मोठ्या प्रमाणात मनुष्यबळ हलविण्यात आले आहे.
एकाच वेळी एवढ्या मोठ्या प्रमाणात बदली आदेश निघाल्याने पोलिस दलात उलटसुलट चर्चा सुरू आहे. काहीजण याकडे नियमित प्रशासकीय प्रक्रिया म्हणून पाहत असले, तरी काहींमध्ये या निर्णयामागील कारणांबाबत उत्सुकता आणि संभ्रम व्यक्त केला जात आहे.[metaslider id=868]
