महाराष्ट्र एक्सप्रेस न्यूज
लोणी काळभोर दि.९ : पुणे जिल्ह्यात प्रतिष्ठेची मानली जाणारी हवेली पंचायत समिती अखेर राष्ट्रवादी काँग्रेसच्या ताब्यात गेली असून सभापतीपदी युवराज हिरामण काकडे तर उपसभापतीपदी अपक्ष सदस्य विद्या दत्तात्रय गायकवाड यांची बिनविरोध निवड झाली आहे.
या निवडीमुळे हवेली तालुक्यातील राजकीय समीकरणांना नवा रंग चढला असून अपक्षाच्या पाठिंब्यामुळे सत्ता स्थापन झाल्याची जोरदार चर्चा राजकीय वर्तुळात रंगली आहे.
हवेली पंचायत समितीच्या सभागृहात सभापती व उपसभापती पदासाठी निवडणूक प्रक्रिया सोमवारी (दि.९) रोजी पार पडली. सभापती पदासाठी युवराज काकडे तर उपसभापती पदासाठी अपक्ष सदस्य विद्या गायकवाड यांचा एकमेव अर्ज दाखल झाल्याने निवडणूक निर्णय अधिकारी यशवंत माने यांनी दोघांचीही बिनविरोध निवड झाल्याची घोषणा केली. निवड जाहीर होताच उपस्थित सदस्यांनी टाळ्यांच्या कडकडाटात दोघांचे स्वागत केले. त्यानंतर पुष्पगुच्छ देऊन सत्कार करण्यात आला. यावेळी पंचायत समिती सदस्य मनोज ऊर्फ कृषीराज चौधरी, कोमल कांबळे, सुषमा मुरकुटे, अमोल टेकाळे, युवराज वांजळे यांच्यासह विविध पक्षांचे पदाधिकारी व कार्यकर्ते मोठ्या संख्येने उपस्थित होते.
निवडीनंतर बोलताना नवनिर्वाचित सभापती युवराज काकडे म्हणाले की, हवेली तालुक्यातील विकासकामांना गती देण्यासाठी सर्व सदस्यांना सोबत घेऊन काम केले जाईल. गावागावातील रस्ते, पाणीपुरवठा, शिक्षण, आरोग्य आणि मूलभूत सुविधा यावर विशेष भर देत तालुक्याच्या सर्वांगीण विकासासाठी प्रयत्न केले जातील.
उपसभापती विद्या दत्तात्रय गायकवाड यांनी देखील सभागृहातील सर्व सदस्यांच्या सहकार्याने तालुक्यातील नागरिकांच्या प्रश्नांवर प्राधान्याने काम करण्याचा निर्धार व्यक्त केला. पंचायत समितीच्या माध्यमातून ग्रामीण भागातील विकासाला चालना देण्यासाठी प्रयत्नशील राहणार असल्याचे त्यांनी सांगितले.
अपक्षाच्या पाठिंब्याने सत्तेची गणिते जुळली
हवेली पंचायत समितीवर सत्ता स्थापन करण्यासाठी ७ सदस्यांचा ‘मॅजिक फिगर’ आवश्यक होता. निवडणुकीत राष्ट्रवादी काँग्रेसला ६ जागांवर विजय मिळाला होता. त्यामुळे सत्ता स्थापनेसाठी केवळ एक जागेची कमतरता राष्ट्रवादी काँग्रेस समोर उभी राहिली होती. या पार्श्वभूमीवर राष्ट्रवादीच्या वरिष्ठ नेत्यांच्या बैठका व राजकीय हालचालींना वेग आला. अखेर अपक्ष पंचायत समिती सदस्य विद्या दत्तात्रय गायकवाड यांनी राष्ट्रवादीला पाठिंबा जाहीर केला. त्यांच्या पाठिंब्यामुळे राष्ट्रवादीचे संख्याबळ ७ वर पोहोचले आणि हवेली पंचायत समितीवरील सत्तेचा मार्ग मोकळा झाला. या राजकीय डावपेचांनंतर राष्ट्रवादीनेही रणनीती आखत अपक्ष विद्या गायकवाड यांना उपसभापतीपदाची संधी देत सत्ता समीकरणे पक्की केली.
