लोणी काळभोरमध्ये टँकरचा जोरदार स्फोट; वेल्डिंगदरम्यान अपघात, कामगार गंभीर भाजला
लोणी काळभोर, ता. ५ : पुणे-सोलापूर राष्ट्रीय महामार्गालगत असलेल्या माळी मळा परिसरात मंगळवारी सकाळी भीषण स्फोटाची घटना घडली. टँकरवर दुरुस्तीचे वेल्डिंग काम सुरू असताना अचानक झालेल्या स्फोटामुळे परिसर हादरून गेला. या दुर्घटनेत एक कामगार गंभीररीत्या भाजला असून त्याच्यावर पुण्यात उपचार सुरू आहेत.
माहितीनुसार, ‘भारत वेल्डिंग वर्क्स’ या वर्कशॉपमध्ये सकाळी साडेनऊच्या सुमारास टँकर दुरुस्तीचे काम सुरू होते. याच वेळी टाकीत साचलेल्या वायूमुळे अचानक स्फोट झाला. स्फोट इतका तीव्र होता की शेडचे पत्रे उडून गेले आणि आजूबाजूच्या परिसरात घबराट पसरली.
या अपघातात चांद बाबू हा कामगार गंभीर जखमी झाला. स्फोटानंतर तो काही वेळ शेडखाली अडकून पडला होता. घटनेची माहिती मिळताच स्थानिक नागरिक व पदाधिकाऱ्यांनी तत्काळ घटनास्थळी धाव घेतली. माजी उपसरपंच राजेंद्र काळभोर, अजय मोरे, अनिरुद्ध मराठे आणि रामा काळे यांनी प्रसंगावधान राखत जखमीला बाहेर काढले आणि रुग्णवाहिकेद्वारे पुण्यातील रुग्णालयात हलवले.
स्फोटामुळे टँकरचे मोठ्या प्रमाणावर नुकसान झाले असून आवाज दूरवर ऐकू गेल्याने नागरिकांमध्ये भीतीचे वातावरण निर्माण झाले होते. सुदैवाने या घटनेत इतर कोणतीही जीवितहानी झाली नाही.
प्राथमिक अंदाजानुसार, संबंधित टँकर पेट्रोल-डिझेल वाहतुकीसाठी वापरला जात होता. टाकीत उरलेल्या ज्वलनशील वायूंमुळे वेल्डिंगच्या ठिणगीने स्फोट झाला असावा, अशी शक्यता वर्तवली जात आहे. नेमके कारण शोधण्यासाठी अधिक तपास सुरू आहे.
या घटनेमुळे औद्योगिक सुरक्षेच्या नियमांचे काटेकोर पालन किती गरजेचे आहे, हे पुन्हा अधोरेखित झाले आहे. स्थानिक प्रशासनाने या प्रकरणाची दखल घेतली असून, निष्काळजीपणा आढळल्यास संबंधितांवर कठोर कारवाई केली जाईल, अशी माहिती समोर येत आहे.
