लोणी काळभोर–मांजरी परिसरात जीवघेणा हल्ला; आरोपी 24 तासांत जेरबंद, पोलिसांची धडाकेबाज कारवाई
लोणी काळभोर, ता. 22 : पुणे–सोलापूर महामार्गावरील द्राक्ष संशोधन केंद्राजवळ एका इसमावर धारदार शस्त्राने जीवघेणा हल्ला करून फरार झालेल्या आरोपींना लोणी काळभोर पोलिसांनी अवघ्या 24 तासांत अटक करत मोठे यश मिळवले आहे.
या कारवाईत पोलिसांनी आरोपींकडून धारदार शस्त्रे व दुचाकी वाहन जप्त केले असून, ताब्यात घेतलेल्या आरोपींमध्ये एका अल्पवयीन मुलाचाही समावेश आहे.
अटक करण्यात आलेल्या आरोपींची नावे सुरेश बाबुराव गायकवाड (वय 18, रा. घोरपडेवस्ती), कुणाल राहुल चौगुले (वय 18, रा. कदकवाकवस्ती) आणि एक विधीसंघर्षित बालक (वय 17) अशी आहेत.
पोलिसांच्या माहितीनुसार, आरोपींनी गणेश नवनाथ कांबळे यांच्यावर हल्ला केला होता. या हल्ल्यात कांबळे जखमी झाले असून त्यांच्यावर सध्या उपचार सुरू आहेत. या प्रकरणी मांजरी पोलीस ठाण्यात गुन्हा दाखल करण्यात आला होता.
गुन्हा घडल्यानंतर आरोपी फरार झाले होते. मात्र, लोणी काळभोर पोलिसांचे पथक गस्तीदरम्यान सतर्क होते. त्यावेळी टोल नाका परिसरात काही संशयित इसम धारदार शस्त्रांसह फिरत असल्याची माहिती खबऱ्याकडून मिळाली. त्यानुसार पोलिसांनी तत्काळ सापळा रचून छापा टाकत आरोपींना अटक केली.
चौकशीत आरोपींनी गुन्ह्याची कबुली दिली आहे. त्यांच्या ताब्यातून बेकायदेशीर शस्त्रे जप्त करण्यात आली असून, त्यांच्यावर भारतीय हत्यार कायदा कलम 4(25), महाराष्ट्र पोलीस कायदा कलम 37(1)(3) सह 135 तसेच भारतीय न्याय संहिता कलम 3(5) अन्वये गुन्हा नोंद करण्यात आला आहे. तसेच मांजरी येथील हल्ल्याचा गुन्हाही या कारवाईत उघडकीस आला आहे.
ही कारवाई पोलीस उपआयुक्त डॉ. राजकुमार शिंदे आणि सहाय्यक पोलीस आयुक्त अनुराधा उदमले यांच्या मार्गदर्शनाखाली पार पडली. वरिष्ठ पोलीस निरीक्षक राजेंद्र पन्हाळे, पोलीस निरीक्षक (गुन्हे) स्मिता पाटील, उपनिरीक्षक दिगंबर सोनटक्के व त्यांच्या पथकाने ही यशस्वी कारवाई केली.
