निष्काळजीपणाचा बळी – असुरक्षित घसरगुंडी कोसळून ४ वर्षीय चिमुकलीचा मृत्यू; सोसायटी पदाधिकाऱ्यांवर गुन्हा
हडपसर, ता. 23 : मगरपट्टा परिसरातील वेदविहार सोसायटीमध्ये धक्कादायक घटना घडली असून, योग्यरित्या बसवण्यात न आलेल्या लोखंडी घसरगुंडीमुळे ४ वर्षांच्या चिमुकलीचा दुर्दैवी मृत्यू झाला आहे. या घटनेमुळे परिसरात हळहळ व्यक्त होत असताना संतापाची लाटही उसळली आहे.
मृत मुलीचे नाव अनिका (वय ४.५) असे असून, या प्रकरणी तिचे वडील नवनाथ देवीकर (वय ३४) यांनी हडपसर पोलीस ठाण्यात तक्रार दाखल केली आहे. ते आयटी क्षेत्रात कार्यरत असून कुटुंबासह संबंधित सोसायटीत राहतात.
मिळालेल्या माहितीनुसार, ७ एप्रिल रोजी दुपारच्या सुमारास अनिका शाळेतून घरी आल्यानंतर सोसायटीच्या परिसरात खेळण्यासाठी गेली होती. त्यावेळी रस्त्यालगत ठेवलेली, नीट बसवलेली नसलेली लोखंडी घसरगुंडी अचानक कोसळून तिच्या डोक्यावर व मानेवर आदळली. या अपघातात ती गंभीर जखमी झाली.
घटनेनंतर कुटुंबीयांनी आणि स्थानिकांनी तात्काळ तिला जवळच्या खासगी रुग्णालयात दाखल केले. अतिदक्षता विभागात उपचार सुरू असतानाही तब्बल आठ दिवसांच्या संघर्षानंतर १५ एप्रिल रोजी तिचा मृत्यू झाला. या घटनेने परिसरात शोककळा पसरली आहे.
दरम्यान, या दुर्घटनेमागे सोसायटी प्रशासनाची हलगर्जीपणा असल्याचा आरोप होत आहे. रहिवाशांनी सांगितले की, ही घसरगुंडी अनेक दिवसांपासून धोकादायक स्थितीत होती आणि याबाबत वारंवार तक्रारी करण्यात आल्या होत्या. मात्र, त्याकडे दुर्लक्ष करण्यात आले.
या प्रकरणी सोसायटीचे चेअरमन आणि कार्यकारिणी सदस्यांविरुद्ध भारतीय न्याय संहिता (BNS) कलम १०६ व ३(५) अंतर्गत गुन्हा नोंदवण्यात आला असून पोलीस अधिक तपास करत आहेत.
“इशारे देऊनही कारवाई नाही”
रहिवाशांच्या मते, संभाव्य अपघाताबाबत आधीच सूचना देण्यात आल्या होत्या. तरीही योग्य ती उपाययोजना न केल्याने एका निरागस जीवाचा बळी गेला. या घटनेनंतर सोसायट्यांमधील सुरक्षाव्यवस्थेबाबत गंभीर प्रश्न उपस्थित झाले आहेत.
