गुन्हे तपासात हस्तक्षेप महागात; लोणी काळभोर पोलीस ठाण्यातील पोलीस हवालदार धेंडे निलंबित
लोणी काळभोर : पुणे शहर पोलिस दलात खळबळ उडवणारी कारवाई करण्यात आली असून, लोणी काळभोर पोलीस ठाण्यात कार्यरत असलेले पोलीस हवालदार केतन उत्तम धेंडे यांना निलंबित करण्यात आले आहे. गुन्हे तपासात हस्तक्षेप केल्याचा तसेच शिस्तभंग केल्याचा ठपका त्यांच्यावर ठेवण्यात आला आहे.
पोलीस उप आयुक्त (मुख्यालय), पुणे शहर यांनी ६ मे २०२६ रोजी निलंबनाचा आदेश जारी केला. गुन्हे शाखेच्या खंडणी विरोधी पथक-२ आणि लोणी काळभोर पोलीस ठाण्याच्या वरिष्ठ अधिकाऱ्यांनी सादर केलेल्या चौकशी अहवालानंतर ही कारवाई करण्यात आल्याची माहिती सूत्रांनी दिली.
मिळालेल्या माहितीनुसार, लोणी काळभोर पोलीस ठाण्यात दाखल असलेल्या एनडीपीएस कायद्यांतर्गत गुन्हा क्रमांक ११५/२०२६ मधील आरोपींना मदत करण्याच्या उद्देशाने धेंडे यांनी तपासी अधिकाऱ्यांवर दबाव टाकल्याचा आरोप आहे. आरोपींना मदत व्हावी यासाठी त्यांनी संबंधित तपासी अधिकाऱ्यांना वारंवार दूरध्वनी केल्याचे, तसेच प्रत्यक्ष भेट घेऊन तपासात हस्तक्षेप केल्याचे चौकशीत निष्पन्न झाल्याचे सांगण्यात येत आहे.
या प्रकारामुळे पोलिस दलाची प्रतिमा मलिन झाल्याचे तसेच संबंधित कर्मचाऱ्याचे वर्तन शिस्तीला बाधक असल्याचे निलंबन आदेशात नमूद करण्यात आले आहे. महाराष्ट्र नागरी सेवा (वर्तणूक) नियम १९७९ मधील नियम क्रमांक ३ चे उल्लंघन केल्याचाही ठपका ठेवण्यात आला आहे.
निलंबन काळात धेंडे यांना नियमानुसार निर्वाह भत्ता मिळणार असून, त्यांना कोणताही खासगी व्यवसाय अथवा नोकरी करता येणार नाही. तसेच दररोज पोलीस मुख्यालयात हजेरी लावणे बंधनकारक करण्यात आले आहे. मुख्यालय क्षेत्राबाहेर जाण्यासाठी वरिष्ठ अधिकाऱ्यांची पूर्वपरवानगी घेणे आवश्यक राहणार आहे.
या कारवाईमुळे पुणे पोलिस दलात मोठी चर्चा सुरू झाली असून, शिस्तभंगाच्या प्रकरणांमध्ये वरिष्ठ अधिकारी कठोर भूमिका घेत असल्याचे स्पष्ट झाले आहे.
