Loni Kalbhor : लोणी काळभोरमध्ये गुटखा तस्करीचा भांडाफोड; महिलेच्या घरातून ५ लाखांचा प्रतिबंधित माल जप्त
लोणी काळभोर, ता. १५ : राज्यात गुटखा बंदी असतानाही लोणी काळभोर परिसरात गुटख्याचा काळाबाजार मोठ्या प्रमाणात सुरू असल्याचे पुन्हा एकदा उघड झाले आहे. लोणी काळभोर पोलिसांनी माळी मळा परिसरात केलेल्या कारवाईत तब्बल ५ लाखांपेक्षा अधिक किमतीचा प्रतिबंधित गुटखा, पान मसाला आणि तंबाखूजन्य पदार्थांचा साठा जप्त केला. या प्रकरणी एका महिलेविरोधात गुन्हा दाखल करण्यात आला असून परिसरात मोठी खळबळ उडाली आहे.
वैशाली संजय खेतमाळीस (वय ४८) असे गुन्हा दाखल करण्यात आलेल्या महिलेचे नाव आहे. पोलीस अंमलदार अशोक भागवत गिरी यांनी लोणी काळभोर पोलीस ठाण्यात सरकारतर्फे फिर्याद दिली आहे.
पोलिसांनी दिलेल्या माहितीनुसार, लोणी काळभोर पोलीस आणि गुन्हे शाखा युनिट ६ चे पथक बुधवारी (ता. १३) नियमित गस्त घालत असताना माळी मळा परिसरात एका घरातून गुटख्याची बेकायदेशीर विक्री होत असल्याची माहिती मिळाली. त्यानुसार पोलिसांनी तत्काळ संबंधित ठिकाणी छापा टाकला.
घरातूनच सुरू होता गुटख्याचा अवैध साठा
छाप्यादरम्यान घरामध्ये मोठमोठ्या पोत्यांमध्ये आणि बॅगमध्ये भरून ठेवलेला गुटखा व तंबाखूजन्य पदार्थांचा साठा आढळून आला. डायरेक्टर स्पेशल पान मसाला, विमल पान मसाला, आरएमडी, रजनीगंधा, वी-१ तंबाखू, तुलसी तंबाखू आणि शॉट प्रीमियम च्युइंग टोबॅको यांसारख्या प्रतिबंधित ब्रँडचा मोठ्या प्रमाणात साठा पोलिसांनी जप्त केला.
या कारवाईत एकूण ५ लाख ७ हजार १९९ रुपयांचा मुद्देमाल ताब्यात घेण्यात आला. शासनाने बंदी घातलेल्या पदार्थांची साठवणूक आणि विक्री करणे हा गंभीर गुन्हा असूनही परिसरात हा अवैध व्यवसाय सुरू असल्याचे समोर आल्याने नागरिकांनी संताप व्यक्त केला आहे.
किराणा दुकानाच्या आड सुरू होता जीवघेणा व्यवसाय
तपासादरम्यान किराणा दुकानाच्या आडून गुटखा विक्रीचे रॅकेट चालवले जात असल्याची माहिती पुढे आली आहे. गुटखा आणि सुगंधित तंबाखूमुळे मुखाचा कर्करोग, हृदयविकार यांसारखे गंभीर आजार होतात, हे माहिती असतानाही पैशाच्या हव्यासापोटी हा व्यवसाय सुरू असल्याचे दिसून आले आहे.
पोलिसांनी पंचांसमक्ष सर्व माल जप्त करून त्याचे नमुने सीलबंद केले आहेत. याप्रकरणी अन्न सुरक्षा आणि मानके अधिनियम २००६ तसेच भारतीय न्याय संहिता (BNS) २०२३ अंतर्गत विविध कलमान्वये गुन्हा दाखल करण्यात आला आहे.
गुटखा पुरवठादारांचा शोध सुरू
एवढ्या मोठ्या प्रमाणावर प्रतिबंधित गुटखा लोणी काळभोरमध्ये कोणाकडून आणला जात होता? यामागे कोणते मोठे पुरवठादार कार्यरत आहेत? पुणे जिल्ह्यात आणखी कुठे असे रॅकेट सुरू आहे का? या सर्व बाबींचा पोलीस तपास सुरू असून, या कारवाईनंतर गुटखा माफियांमध्ये भीतीचे वातावरण निर्माण झाले आहे.
