पुणे सोलापूर महामार्गावरील हडपसर ते उरुळीकांचन रस्त्याची तात्काळ दुरुस्ती करा- सभापती युवराज काकडे
पुणे : पुणे- सोलापूर महामार्गावरील हडपसर ते उरुळीकांचन या मार्गाची मोठ्या प्रमाणात दुरावस्था झाली असून, रस्त्यावर पडलेल्या खड्ड्यांमुळे वाहनचालक व नागरिकांना मोठ्या त्रासाला सामोरे जावे लागत आहे. त्यामुळे हा रस्ता तात्काळ दुरुस्त करण्यात यावा, अशी मागणी पंचायत समिती हवेलीचे सभापती युवराज काकडे यांनी, राष्ट्रीय महामार्ग प्राधिकरण (NHI) व महाराष्ट्र राज्य पायाभूत सुविधा विकास महामंडळ (MSIDC) कडे केली.
हडपसर- उरुळीकांचन रस्त्यावर अनेक ठिकाणी रस्त्याच्या पृष्ठभागाचे मोठ्या प्रमाणात नुकसान झाले आहे. पावसामुळे खड्ड्यांमध्ये पाणी साचत असल्याने वाहनचालकांना खड्ड्यांचा अंदाज येत नसून, अपघाताचा धोका निर्माण झाला आहे. तसेच या मार्गावर दररोज मोठ्या प्रमाणात वाहतूक होत असल्याने, खराब रस्त्यामुळे वाहतूक अत्यंत संथ झाली आहे. यामुळे पुणे- सोलापूर हायवेवर नागरिकांना प्रचंड वाहतूक कोंडीचा सामना करावा लागतो आहे.
तसेच या मार्गावर MNGL गॅस पाईप लाईनच्या कामामुळे रस्त्याच्या बाजूचा साईड पट्टाही संपूर्ण खराब झाला आहे. यामुळे अनेक दुचाकीस्वार घसरून पडत आहेत. पार्श्वभूमीवर सभापती युवराज काकडे यांनी, राष्ट्रीय महामार्ग प्राधिकरण (NHI) व महाराष्ट्र राज्य पायाभूत सुविधा विकास महामंडळ (MSIDC) दोन्ही अधिकाऱ्यांकडे रस्त्याची तातडीने पाहणी करून, रस्त्याचे व साईड पट्ट्याच्या दुरुस्तीचे काम हाती घेण्याची मागणी केली आहे.
हडपसर ते उरुळीकांचन हा पुणे-सोलापूर महामार्गावरील अत्यंत महत्त्वाचा मार्ग आहे. रस्त्याची झालेली दुरवस्था नागरिकांच्या जीवितास धोकादायक ठरत आहे. त्यामुळे कोणत्याही प्रकारची दिरंगाई न करता रस्त्याची तात्काळ दुरुस्ती करावी, अशी मागणी सभापती काकडे यांनी केली
पुणे- सोलापूर व पुणे- अहिल्यानगर महामार्गावर नव्याने होणाऱ्या बहुमजली उड्डाणपुलाच्या पार्श्वभूमीवर, आमदार ज्ञानेश्वर उर्फ माऊली आबा कटके यांच्या नेतृत्वाखाली, येत्या काही दिवसात राष्ट्रीय महामार्ग प्राधिकरण (NHI) व महाराष्ट्र राज्य पायाभूत सुविधा विकास महामंडळ (MSIDC) चे सर्व अधिकारी, पदाधिकारी, रस्त्यालगतचे शेतकरी व स्थानिक ग्रामस्थांसह संयुक्त पाहणी व समन्वय बैठक होणार असल्याचे सभापती युवराज काकडे यांनी सांगितले.
