दोन लाखांची मागणी, एक लाखांवर तडजोड; अपर तहसील कार्यालय लोणी काळभोर मधील ग्राम महसूल अधिकाऱ्यावर लाचखोरीचा गुन्हा
लोणी काळभोर : पूर्व हवेलीतील लोणी काळभोर अपर तहसील कार्यालयात कार्यरत असलेल्या ग्राम महसूल अधिकाऱ्यावर लाच मागितल्याप्रकरणी लाचलुचपत प्रतिबंधक विभागाने (एसीबी) कारवाई करत लोणी काळभोर पोलीस ठाण्यात गुन्हा दाखल केला आहे. या कारवाईमुळे महसूल विभागात खळबळ उडाली आहे.
लाचलुचपत प्रतिबंधक विभागाने दिलेल्या माहितीनुसार, अक्षय शिवाजी कोल्हे (वय २८), पद – ग्राम महसूल अधिकारी, अपर तहसील कार्यालय, लोणी काळभोर, यांच्या विरोधात भ्रष्टाचार प्रतिबंधक कायद्यान्वये गुन्हा दाखल करण्यात आला आहे.
तक्रारदार हे जमीन खरेदी-विक्री व्यवसायाशी संबंधित असून त्यांनी हवेली तालुक्यातील हिंगणगाव येथील शेतजमीन सपाटीकरण, विहीर खोदकाम व पाईपलाईन टाकण्याच्या परवानगीसाठी अपर तहसीलदार कार्यालय, लोणी काळभोर येथे अर्ज केला होता. या अर्जावरील कार्यवाही करून देण्यासाठी अक्षय कोल्हे यांनी सुरुवातीला दोन लाख रुपयांच्या लाचेची मागणी केल्याची तक्रार तक्रारदाराने १ मे २०२६ रोजी एसीबी, पुणे कार्यालयाकडे केली होती.
त्यानंतर एसीबीने २ मे २०२६ रोजी मागणी पडताळणी कारवाई केली. या पडताळणीदरम्यान संबंधित अधिकाऱ्याने तडजोडीअंती एक लाख रुपयांची लाच मागितल्याचे निष्पन्न झाले.
या प्रकरणी अक्षय कोल्हे यांच्या विरोधात लोणी काळभोर पोलीस ठाण्यात भ्रष्टाचार प्रतिबंधक कायद्यान्वये गुन्हा दाखल करण्यात आला असून पुढील तपास लाचलुचपत प्रतिबंधक विभागाकडून सुरू आहे.
महसूल विभागातील अधिकाऱ्यावर झालेल्या या कारवाईमुळे परिसरात चर्चेला उधाण आले असून प्रशासनातील भ्रष्टाचाराचा मुद्दा पुन्हा ऐरणीवर आला आहे.
