जमिनीच्या वादातून गुंडाने झाडल्या गोळ्या ; गुन्हेगारी टोळीचा सहभाग उघड, दौंड तालुक्यातील घटना..!
महाराष्ट्र एक्सप्रेस न्यूज : हनुमंत सुरवसे
Daund News : पुणे जिल्ह्यातील दौंड तालुक्यातील केडगाव परिसरात जमिनीच्या वादातून गोळीबाराची घटना घडल्याने परिसरात एकच खळबळ उडाली आहे. शनिवारी पहाटे केडगाव स्टेशन परिसरातील एका गृहनिर्माण संस्थेजवळ ही घटना घडली.
गोळीबाराचा आवाज ऐकून स्थानिक नागरिक घाबरून घराबाहेर आले आणि तात्काळ पोलिसांना माहिती दिली. या घटनेनंतर पोलिसांनी तत्पर कारवाई करत अवघ्या १२ तासांत एका संशयित आरोपीला अटक केली आहे.
पोलिसांनी दिलेल्या माहितीनुसार, जमिनीच्या व्यवहारावरून दोन गटांमध्ये काही दिवसांपासून वाद सुरू होता. त्याच वादातून हा प्रकार घडल्याचा प्राथमिक अंदाज व्यक्त करण्यात आला आहे. पहाटेच्या सुमारास एका व्यक्तीने पिस्तुल मधून हवेत गोळीबार केल्याचे समोर आले आहे. गोळीबाराचा आवाज ऐकून परिसरात भीतीचे वातावरण निर्माण झाले आहे
घटनेची माहिती मिळताच पोलिसांनी तातडीने घटनास्थळी धाव घेतली. परिसराची पाहणी केली असता पिस्तुलीतून झाडलेल्या गोळीची पुंगळी घटनास्थळी आढळून आली. त्यानंतर पोलिसांनी परिसरातील सीसीटीव्ही (Cctv) कॅमेऱ्यांचे फुटेज तपासले आणि इतर माहिती गोळा करण्यास सुरुवात केली.
तपासादरम्यान पोलिसांनी संशयित हालचालींच्या आधारे एका तरुणाला ताब्यात घेतले. सखोल चौकशीनंतर त्याला अटक करण्यात आली असून त्याच्याविरुद्ध गुन्हा दाखल करण्याची प्रक्रिया सुरू आहे. या प्रकरणात आणखी काही जणांचा सहभाग आहे का, याचाही तपास पोलिसांकडून केला जात आहे.
दरम्यान, जमिनीच्या वादातून झालेल्या या गोळीबारामुळे केडगाव परिसरात काही काळ तणावाचे वातावरण निर्माण झाले होते. पोलिसांनी तातडीने कारवाई केल्यामुळे परिस्थिती नियंत्रणात आली आहे.
यवत मध्येही महार वतनाची जमीन हडपण्याचा डाव
यवत ग्रामपंचायत हद्दीमध्ये श्रीमती सिंधूबाई तुकाराम गायकवाड वय ६३, यांची यवत स्टेशन परिसरात गट नंबर ३८२/१ अशी महार वतनाची वडिलोपार्जित जमीन असून ती जमीन काही राजकीय गाव गुंडानी दहशत निर्माण करून हडपण्याचा प्रयत्न केला असल्याचा आरोप सिंधूबाई गायकवाड व तसेच त्यांच्या कुटूंबीयांनी केला असून यवत पोलीस स्टेशन ला राजमाता जिजाऊ ब्रिगेड दौंड तालुका या संघटनेच्या वतीने निवेदन देण्यात आले आहे.
